Suns Europe 2024. Musichis, peraulis e visions pal dirit ae lenghe e ae diversitât

Suns Europe 2024. Musichis, peraulis e visions pal dirit ae lenghe e ae diversitât

Al mancje pôc a Suns Europe 2024. La gnove edizion dal festival european des arts tes lenghis minorizadis, inmaneât de cooperative Informazione Friulana, cul jutori finanziari de Regjon autonome Friûl-VJ, de ARLeF – Agjenzie Regjonâl pe Lenghe Furlane e di altris sogjents publics e privâts di chenti e di fûr. si davuelzarà ator pal Friûl dai 11 ai 19 di Otubar. Ancje par chest an la rassegne e met dongje une schirie di events, tra incuintris, concierts, spetacui teatrâi e fintremai apontaments di divulgazion e di aprofondiment tematic in cont di dirits linguistics, promozion dal teritori, dialic interculturâl e citadinance europeane.

Il festival che al puarte la Europe in Friûl e il Friûl in Europe

Chê dal 2024 e je la diesime edizion di Suns Europe. Cun di fat il festival al esist dal 2015, cuant che vie pe Sierade al vignive inmaneât pe prime volte. L’intindiment za in chel moment al jere clâr: presentâ une selezion de produzion artistiche e culturâl plui inovative intes lenghis minorizadis di dut il continent, creâ e disvilupâ conessions e colaborazions tra artiscj, organizazions e altris entitâts che a son espression des diviersis minorancis e nazionalitâts, puartâ la Europe in Friûl e il Friûl in Europe e soredut fâ indenant une vision diferente de Europe e dal mont, fondade sul pluralisim linguistic e culturâl in dutis lis sôs dimensions. 

Dilunc vie dai agns la formule in part e je mudade, stant che in cualchi edizion il program al è stât concentrât in pôcs dîs e in pôcs puescj, intant che in altris agns – par esempli tal 2022 e tal 2023 –  il so cartelon al à vût une estension plui grande, tal spazi, tocjant cetantis localitâts di dut il Friûl, e tal timp, cuntun disvilup jenfri Istât e Sierade. Cundut achel, il so spirt al reste simpri chel, cemût che al ven sclarît dal sproc che lu compagne: «Dirit ae lenghe, dirit ae diversitât».

La storie. Di une radio che e je “plui che une radio” a un festival che al è “plui che un festival”

Nol è un câs che Suns Europe al vegni fat in Friûl e che al vegni inmaneât di Informazione Friulana, la societât editore di Radio Onde Furlane. Il festival si pues calcolâlu tant che une evoluzion de ativitât de emitente e plui in gjenerâl de cooperative, che in passe cuarante agns di lavôr intai setôrs de informazion, de comunicazion, de produzion artistiche e culturâl e a pro de rivendicazion e dal esercizi di dirits di fonde, si è cjatade a colaborâ e a disvilupâ relazions cun diviersis entitâts che a son ativis in chei stes cjamps intal contest di altris comunitâts linguistichis minorizadis. Plui in detai si pues vualmâ un percors che al partìs de radiofonie, al tocje chel progjet fondamentâl, tant che farie di creativitât in lenghe furlane, che al è stât il Premi Friûl, al incrose diviersis produzions editoriâls (poesie, narative, sagjistiche, musiche e audiovisîfs) nassudis dentri e in bande de emitente, cjapant dentri ancje la etichete discografiche Musiche Furlane Fuarte, e al rive ae organizazion di Suns, il festival dedicât aes cjançons tes lenghis di minorance de zone euromediteranie, che a un ciert pont si à slargjât a dut il continent e ancje a altris formis di espression artistiche, de leterature al teatri e al cine. E cussì al è nassût Suns Europe.

Se in cont di Onde Furlane, par dut ce che e à fat e che e fâs, cjapant sù l’innomenât sproc par catalan dal FC Barcelona, «mes que un club», si podarès dî che e je «plui che une radio», cun riferiment a Suns Europe, pes sôs motivazions e finalitâts di fonde, si pues dî che al è «plui che un festival».

A Gurize, Cormons e San Vît. Un confront cun plui vôs e un incuintri dopli tra Friûl e Paîs Basc

Suns Europe 2024 si scree a Gurize vinars ai 11 di Otubar a 5 dopo di misdì. Inte part di ca dal clap de Capitâl europeane de culture 2025, li de mediateche Ugo Casiraghi (vie Bombi n. 7) si davuelzarà l’incuintri dal titul Plui lenghis, plui culture, plui Europe: un confront cun plui vôs in cont dai temis di fonde dal festival e salacor ancje di GO!2025 (che propit par chel no si capìs parcè che dongje di sloven, talian e inglês nol vedi tra lis sôs lenghis uficiâls ancje il furlan…). 

Plui tart, a 9 di gnot a Cormons al sarà il prin conciert de rassegne. Al è il prin di doi incuintris in musiche tra Paîs Basc e Friûl, stant che li de cantine de Aziende agricole Gradnik (localitât Plessive n. 5) si podarà viodi e scoltâ dal vîf Don Condor eta Ñora Alacran cu la lôr misture scalembre di cumbia, surf ’n’roll e tescj par euskara e i Pokriva Nociva, band di ispirazion indie rock che e rive des Valadis dal Nadison e che e cjante par sloven. 

Il secont conciert che al met dongje espressions musicâls baschis e nostranis al è chel di sabide ai 12 di Otubar. A 9 di sere a San Vît dal Tiliment, li dal circul ARCI CRAL ‘Ciliti’ (vie Vittorio Veneto n. 13) a sunaran i Bakan, storiche formazion di Glemone che juste pôcs mês indaûr e à dât fûr il so album gnûf ‘Al torne dut’ e di passe trente agns si fâs preseâ pes sôs cjançons scletis par furlan là che si incrosin rock, folk e altris ispirazions, e Niña Coyote eta Chico Tornado, cubie innomenade pal so rock ‘n’ roll ruspiôs e cence compromès.

Ai 17 e ai 18 di Otubar, a Codroip, a Udin e a Pradaman

Dopo dai apontaments tal Friûl orientâl e in chel di soreli a mont, Suns Europe al rive ancje tal Friûl centrâl. Joibe ai 17 di Otubar, a 9 di sere, a Codroip, sul palc dal Ottagono (vie Marinelli) a sunaran la cjantautore basche Miren Narbaiza, cul so progjet musicâl Mice, il rapper des isulis Faer Øer Silvurdrongur e la band Tumbe, espression des comunitâts arumenis de Romanie. 

Vinars ai 18 a 5 e mieze sot sere, a Udin, li de librarie Tarantola (vie Vittorio Veneto n. 20), al sarà l’incuintri cun Mikael Bodlore-Penlaez, gjeograf, cartograf e ativist, che intal 1999 al à metût sù il portâl www.eurominority.eu, dedicât aes nazions cence stât e aes comunitâts minorizadis de Europe e che, cul so Atlas des Nations sans État en Europe, intune cu lis milante mapis che al à produsût, al à contribuît a slargjâ la cognossince in cont dai popui minorizâts dal nestri continent.

La serade di vinars si tignarà li dal Yardie di Pradaman (vie Pasolini 8/3). Ancje in chest câs la musiche e tache a 9 di sere. Lis esibizions in program a son chês de band catalane Remei de Ca la Fresca, dal grup galês Ynys e dal rapper rumanç Giganto: une altre biele crosere di lenghis, lengaçs musicâi e esperiencis artistichis di cualitât.

Scuele, teatri e concierton. Dut a Udin, li dal “Teatron”

Chê di sabide ai 19 di Otubar e je la zornade clou di Suns Europe, cun events de buinore fintremai ae gnot, che si davuelzin ducj a Udin li dal Teatri gnûf “Giovanni da Udine” (vie Trento n. 4). Si tache a 10 di matine cun Scuele Europe, lezion-conciert in cont di lenghis, dirits, culturis e Europe cui zovins des scuelis secondariis di secont grât. Si va dilunc a 6 sot sere inte sale dal foyer dal “Teatron” cul spetacul teatrâl Ce crodistu di fâ, une produzion dal Teatri Stabil Furlan che e je un adatament dal test par frison “Wat Soesto” di Freark Smink. A 9 di sere al sarà il concierton finâl cun nûf progjets musicâi che a son espression di ancjetantis comunitâts linguistichis. Si alternaran sul palc i sîs protagoniscj dai events de joibe e dal vinars (Mice, Silvurdrongur, Tumbe, Remei de Ca la Fresca, Ynys e Giganto) e cun lôr ancje la cjantante de Basse Sassonie Marianne Veenstra e in rapresentance dal Friûl di lenghe furlane e di lenghe slovene la cjantautore Nicole Coceancig e la cjantante Gushi compagnade di Raffunk. La serade e à ancje un caratar di competizion, stant che cu lis lôr esibizions i artiscj a concorin pai premis Suns Europe, daûr dal vôt dal public e de valutazion de jurie internazionâl. 

Ducj i events a son a jentrade libare fûr che il conciert finâl, che par chel si à di paiâ il biliet (la prevendite e je za in vore (su www.vivaticket.it e, dai 10 di Otubar, ancje li de bilietarie dal “Giovanni da Udine”) e Scuele Europe, viert dome aes classis che si son notadis.

Stant che Suns Europe al è «plui che un festival», sierât il so program uficiâl, la manifestazion e varà une sô code lunis ai 28 di Otubar a Codroip in place Garibaldi a sîs e mieze sot sere, cuant che la rapresentante musicâl de comunitât linguistiche furlane tal festival, Nicole Coceancig, e sunarà  dal vîf in ocasion de Cerimonie di premiazion de 45esime edizion dal Premi San Simon, innomenât concors leterari in lenghe furlane.

Par vê plui informazions in cont di Suns Europe: www.sunseurope.com e https://www.facebook.com/SunsFestival.