Si à laureât in Siencis politichis a Turin e al è dotôr di ricercje in Storie dal federalisim e de unitât europeane. Dal mês di Març dal 2025 al è ricercjadôr in Storie dal pinsîr politic li de Universitât dal Friûl, là che al insegne Culturis politichis in Europe e Tutele des minorancis, autoguvier teritoriâl e integrazion europeane. Prime al jere a vore li de Universitât di Turin là che al insegnave Storie des relazions internazionâls e Storie e politichis de integrazion europeane, intant che prime ancjemò al veve colaborât cul Ateneu furlan cun ativitâts didatichis e di ricercje di caratar storic e politologjic.I siei interès sientifics a tocjin diviersis tematichis – integrazion europeane, tutele des minorancis, partîts e moviments politics nazionalitaris e regjonaliscj, politichis linguistichis, identitât europeane, migrazions e rapuarts tra media e storie – e al è autôr di cetantis publicazions in cont di chescj argoments.Di passe trente agns al davuelç ancje ativitât gjornalistiche inte stampe cuotidiane e periodiche, tal web e par radio. Al colabore, tra l’altri, cul Messaggero Veneto, cu La Patrie dal Friûl e cun Radio Onde Furlane, là che al è responsabil di trasmissions tant che Babêl Europe, il cuindisinâl di musiche e informazion dedicât aes nazionalitâts minorizadis europeanis.Al à ancje lavorât inte aministrazion publiche, tant che funzionari dal Setôr Bibliotechis de Regjon Piemont, tra il 2003 e il principi dal 2004, e tant che diretôr dal Servizi pes Identitâts linguistichis e pai coregjonâi tal forest de Regjon autonome Friûl-VJ dal 2004 al 2009.
