Mandi, grant Pizzul

Il grant Pizzul. 

O vevin voie di tacâ chest piçul test cuntun ossimor – ven a stâi chê figure retoriche che e consist tal meti dongje, inte stesse frase, peraulis che a esprimin concets contraris: un Grant Pizzul – parcè che o pensìn che, in cualchi maniere, al definedi in maniere perfete ce che al è stât Bruno Pizzul. 

Di fat, a dispiet dal so cognon, Bruno al è stât un grant in ducj i sens: tant dal pont di viste fisic, par vie de sô stature; tant dal pont di viste de sô cariere gjornalistiche, deventant il plui famôs telecronist sportîf de RAI; tant dal pont di viste de umanitât, ducj lu descrivin e lu ricuardin come un brâf om. 

Nassût a Udin ai 8 di Març dal 1938, Bruno Pizzul nus à lassât ai 5 di Març dal 2025 a Gurize; par destin, al è nassût e po dopo mancjât tes dôs capitâls dal Friûl storic e moderni, lui che al Friûl al è simpri stât cetant leât. 

Dilunc dai siei 87 agns al à fat di dut in ambit sportîf: al à tacât la sô cariere dal balon tant che median a Cormons, passant pe Pro Gurize, e rivant tal ‘58 in serie B cul Catania; prime di zuiâ a Ischia e inte Udinese, dulà che al à scugnût molâ il balon par un infortuni intal zenoli. 

Dut câs, une altre e sarès stade la sô vocazion. 

Dopo il liceu classic e la lauree in jurisprudence, tal ‘69 Pizzul al ven cjapât de RAI come radiotelecronist, e l’an dopo al comente la sô prime partide di balon: Juventus – Bologna di Cope Italie. 

Tant che telecronist al à contât di dut: des grandis vitoriis europeanis dal Milan di Rjikaard, Gullit e Van Basten, passant par la vitorie storiche dal Parma in Cope Uefa; e cjantant i gjescj dai grancj balonîrs talians: di Baresi, Ancelotti e Maldini, di Baggio e Del Piero, di Totti, Scirea, Bergomi, Cabrini, Collavati e Tardelli; ducj i grancj a son passâts pe vôs di Bruno. 

No dome grancj moments, ma ancje moments dificii e adiriture tragjics: al jere lui a contâ la finâl mondiâl pierdude tal ‘86 de Italie di Bearzot e tai Europeans dal 2000 di chê dal ami Dino Zoff; al jere lui a contâ i muarts de stragje dal Heysel intal ‘85. 

In Friûl al à contât lis partidis da la Udinese par furlan, di maniere che lis regjistrazions a podessin sei spedidis ai Fogolârs Furlans di dut il mont, permetint ancje ai furlans tal forest di cjalâ lis partidis da la Udinese te lôr lenghe mari. 

Al à simpri sostignût che “fâ la telecroniche par furlan nol è par nuie dificil, anzit! Di fruts o zuiavin ducj di balon par furlan, duncje lis peraulis e lis espressions bielzà lis cognòs. Ciert, bisugne stâ atents a ce che si dîs, di no fâsi scjampâ cualchi peraule di masse, tipiche de nestre lenghe…”. 

La sô vôs nus à compagnât par plui di 30 agns; forsit par chest o sintìn ducj un grant afiet par lui, o forsit, parcè che intun mont di personaçs come che al è chel de television, Bruno al è simpri stât prin di dut une persone. 

Nus vegnin i sgrisui a pensâ a la sô disponibilitât, dome un an indaûr, a fâsi vôs de Nazionâl Furlane ae Europeada, selezion che lui al ritignive “un mût di promovi traviers dal balon la proprie identitât, che e je diferente, ma che e je unitarie in dutis lis bandis dal mont”. 

Purtrop, nol è rivât a fâ la telecroniche de nestre Nazionâl, ma nô de Associazion Sportive Furlane o varessin voie di ringraciâlu e di ricuardâlu, imbastint un torneu di balon a so non: il “trofeu Bruno Pizzul”. 

In ricuart di un grant om furlan, che al à savût fâ il gjornalist tai plui alts nivei dal sport – la vôs storiche dal  balon talian e je, di fat, chê furlane di Bruno Pizzul -, ma che al è simpri restât popolâr e uman, mai dismenteantsi de sô int e de sô tiere. 

Duncje… mandi Bruno, graciis dai insegnaments, graciis de tô ecelenze e de tô umanitât, al è stat pardabon: “dut une vore biel”.