Un Ream (forsit) no plui tant unît

Ai 7 di Mai dal 2026 a saran lis elezions intal Ream Unît, dulà che la popolazion e sarà clamade a rionzi 5.000 sentis des autoritâts locâls inglesis jenfri conteis, sindics e distrets; e a saran soredut rinovâts il Parlament Scozes e il Senedd (chel Galês). 

Chês dai 7 di Mai a saran scuasi sigurementri elezions storichis, dal moment che in dutis e trê lis elezions il Partît Laburist di Keir Starmer al partìs tant che sfavorît. 

Bielzà intes elezions locâls dal an passât, di fat, il Partît Laburist al jere stât batût in maniere pesante, ma no dal Partît Conservadôr (storic alter ego dai Laburiscj) ma di Reform UK: il partît vuidât di Nigel Farage, un dai principâi sostignidôrs de Brexit e ideologjichementri cuintri ae spese publiche, ae imigrazion e aes misuris par scombati la crisi climatiche. 

Daûr dai sondaçs, Reform UK al è dât une vore indenant sedi intes elezions inglesis sedi in chês scozesis e galesis, dulà che dut câs al somee che a dominaran i partîts indipendentiscj: Scottish National Party e Plaid Cymru.

Duncje lis elezions dai 7 di Mai a saran un moment di prove determinante no dome pal guvier di Starmer ma ancje pe tignude stesse dal Ream Unît. 

In struc, i sondaçs des trê elezions. 

Il gjornâl “The Guardian” intun articul resint al à descrit chestis elezions tant che “lis elezions che a podaressin puartâ la plui grande sconfite te storie dai Laburiscj” cun previsions di pierdite di consens che a tocjin il -72%; numars mai viodûts te storie dal Ream Unît. 

In particolâr al somearès che in Ingletiere il Partît Laburist al larà sot dal 20% dai vôts, cuintri un Reform Party che al somearès podê rivâ al 41% dai vôts e a triplicâ lis sentis tai conseis comunâi (si tabaie di un +2.260 sentis). 

Viodût il moment resint dulà che il Guvier Starmer al sta vierzint simpri di plui a une pussibile tornade dal Ream Unît inte Europe, al sarà curiôs capî cemût che la vitorie plausibile di Reform (fuartementri a pro de Brexit) e incidarà sedi sui rapuarts jenfri UK e UE sedi su la capacitât efetive di Starmer di guviernâ il Paîs.

In Scozie il Partît Nazionalist Scozês al è dât tant che prin partît cun plui dal 35% dai vôts, cun Labour e Reform che ancje metûts dongje (17 e alc % parom) no rivin a superâ i vôts dai indipendentiscj bessôi. 

Par trop che al puedi someâ strani, nol è un risultât straordenari pal SNP, che rispiet aes elezions dal 2021, al piert cirche il 12% dai consens; colpe il scandul vignût fûr rivuart la ex leader Nicola Sturgeon – prime indagade par apropriazion indebite e po dopo assolte – propit cuant che il SNP al veve i numars par continuâ fuart il percors viers la indipendence (un câs? Cuissà…). 

Ancje in Scozie al è il Reform Party a vuadagnâ plui vôts di ducj in tiermins percentuâi, dal moment che intal 2021 nancje nol esisteve. 

E reste dut câs fuarte la presince dal SNP che cul gnûf leader John Swinney si è colocât stabilmentri tal centriçampe, di fat sostituint i laburiscj (di agns in colade) e i verts; e daûr dal slogan de campagne eletorâl “unite for independence – unîts pe indipendence” al à dute la intenzion di tirâ dret viers il Referendum pe indipendence de Scozie. 

Gnovis in viste? Al baste spietâ

Il risultât plui storic al podarès rivâ dal Gales, dulà che pe prime volte te storie il Plaid Cymru (leteralmentri: Partît Galês) al è dât tant che prin partît cun plui dal 30% dai vôts. 

Achì i Laburiscj (che a guviernin) a son dâts sot dal 15% rispiet al 34% dal 2021, un vêr disastri; di cheste colade verticâl al à aprofitât il Plaid Cymru che, guviernant cun lôr dal 2021 e dopo vê tornât a meti la lenghe, la identitât e il teritori galês al centri da la lôr politiche (in maniere diferente dai Laburiscj), a corin svelts viers il guvier dal Gales. 

Ancje achì la lote cul Reform Party e sarà fuarte, parcè che il partît di Farage al è dât jenfri il 26-28% dai consens. 

Dut câs, i Welsh Greens (Verts Galês) a son dâts al 10%, numars che zontâts a chei dal Plaid Cymru a vierzaressin la strade a un guvier autonomist – ambientalist. 

Il cuadri des elezions scozesis e galesis al piture une situazion interessante e che si slargje a dut il contest dal Ream Unît: par guviernâ e sperâ di vê vôs cuintri i ultra conservadôrs dal Reform Party, i laburiscj a varan di fâ i conts no dome cu la fuarce di Farage ma soredut cu lis richiestis dai partîts indipendentiscj. 

Tant che in Spagne, dulà che la maiorance di Sanchez e je tignude in pîts dai partîts indipendentiscj catalans, bascs e galizians, lis prossimis elezions intal Ream Unît nus disaran trop che ancje la isule parsore de Maniche e sarà buine di garantî spazi e pês a lis istancis des popolazions di Scozie e Gales.  

Sigurementri, vint di une bande la estreme drete inglese e di chê altre lis vôs indipendentistis, l’avignî dal Ream nol somee masse unît.