Ducj pronts: e rive la “FURL-RUN la corse pal furlan”!
Indice dei contenuti
Al vâ indevant svelt il lavôr de ASF Associazion Sportive Furlane sul teritori dal Friûl.
La associazion nassude ai 4 di Març dal 2023 cun l’obietîf di pandi e prudelâ la lenghe e la culture furlane cun il sport, e à inventade une gnove.
Ai 12 di Avrîl 2026, di fat, si tignarà la “FURL-RUN la corse pal Furlan”, la prime corse dedicade ai paîs, ae int, ae identitât e ae lenghe dal Friûl.
La FURL-RUN e sarà une corse no competitive, gratuite e vierte a ducj, che e pasarà pai borcs dal Friûl in musiche e fieste.
La manifestazion e tacarà aes 6:00 di buinore de Basiliche di Aquilee e e larà dilunc par 120km rivant a Glemone tôr lis 18:00.
La FURL-RUN si disviluparà passant 26 Comuns che a fasin part de ACLiF (Assemblee de Comunitât Linguistiche Furlane).
Intes placis principâls di ogni Comun, i acompagnadôrs uficiâi “I Furlans a Manete” e “I sbandieradôrs Leon Coronato di Spilimberc” dilunc dal passaç de corse a saran protagoniscj di moments di fieste, musiche e ligrie adun cun lis comunitâts dai paîs!
“O volìn meti in moviment la marilenghe. La FURL-RUN no sarà dome une corse, ma un at di braùre e vitalitât de nestre lenghe” al â dite Daniele Puntel, president de ASF.
E al â continuât: “Cun la nestre associazion o lavorìn ogni dì par contâ il sport furlan in furlan, ma cun chest event o volìn che i citadins stes a deventin protagoniscj.
Une dimostrazion che la identitât no je dome intun museu, intun teatri o inte culture, ma che e côr svelte viers il doman”.
La corse e larà indevant a un pas di 6 minûts al chilometri par ducj i 120km, e sarà libare: tal sens che si podarà jentrâ, cori e saltâ fûr dulà che si vûl, ogni persone e podarà cori par trops chilometros che e vûl, cence limits o imposiziôns.
In chest sens, la manifestazion e sarà vierte a ducj e e viodarà la partecipazion di tancj rapresentats dal mont de disabilitât: tacant dal campion paralimpic Luca Da Prato, passant par i sportîfs de ASD IOP Madracs di Udin, e rivant ai grops dal Piçul Cottolengo furlan di Sante Marie e dal Diversamente Bistrot di Udin.
La “FURL-RUN la corse pal furlan” e varà tant che protagonist un testemoni.
Dulinvie de corse, e sarà une persone che e puartarà il testemoni cun la acuile e la bandiere dal Friûl: un simbul di ricognossince, di promozion e vicinanze ae tiere furlane.
Dentri dal testemoni al sarà presint un test, un manuscrit pensât di trê inteletuâi furlans che al contignarà un messaç pe culture, il popul e la lenghe furlane.Il test al vignarà let ae rivade de corse a Glemone; la idee e je che cui cal puarte il testemoni, si fâs puartadôr de savietât de tiere furlane, si fâs puartevôs ideâl de identitât furlane.
In chest sens, il testemoni al sarà assegnât ogni km a une persone diferente, un pôc – cence volê fâ spiei azardâts – il concet al sarâ simil a chê de fogule olimpiche.
Vèn ancje tu! Si viodìn il 12!
La idee de FURL-RUN e cjape spont de Korrika, la corse che di passe 40 agns e ven fate de AEK (Alfabetatze Euskalduntze Koordinakundea – Coordinament pe alfabetizazion e insegnament dal Euskera) tai Paîs Bascs, par prudelâ la lenghe e la identitât Basche.
La Korrika tai Paîs Bascs e je un vêr avigniment sociâl, un dai plui fuarts ats di afermazion politiche e identitarie in Europe.
E ven inmaneade ogni 2 agns e par 11 dîs un daûr di chel altri – dì e gnot, soreli e ploje – e travierse dut il teritori dai Paîs Bascs (Euskal Herria) corint plui di 2.000km e tirant dongje plui di 700.000 personis.Il messaç de Korrika al è che la lenghe no je dome un mieç di comunicazion, ma e je l’element costitutîf de nazion: cence Euskera nol esist il popul Basc. La Korrika, in chest sens, e travierse l’Euskadi (il territori de Comunitât Autonome Basche), la Navarra e la Iparralde (il territori dal Paîs Basc in France); e segne duncje un percors jenfri 3 entitâts che su la cjarte a son sot difarentis aministrazions (Spagne e France), afermant la idee di “Euskal Herria” tant che nazion unitarie: une sfide simboliche ae division territoriâl dai Stâts centrals.
In struc, la Korrika e ven fate par dimostrâ che il popul basc “al è in moviment” e nol â chê di sparî culturalmenti.
E je une dimostrazion di fuarce demografiche e di braùre identitarie che e covente a ricuardâ ai guviers di Madrid e Parigi che la cuistion Basche e je, prime di dut, une cuistion che si decît in Euskal Herria e par volê dai Bascs.
Si augurìn che la FURL-RUN e podedi jessi un sucès sportîf e un moment di riflession pal Friûl e par la comunitât furlane.
I 26 Comuns traviersâts de FURL-RUN a saran: Aquilee, Çarvignan, Rude, Dael, Sant Vît de Tôr, Visc, Trivignan, Sante Marie la Lungje, Bicinins, Mortean, Listize, Puçui, Cjampfuarmit, Pasian di Prât, Udin, Tavagnà, Pagnà, Murùs, Feagne, Rivis Darcjan, Sant Denêl, Maian, Buie, Dartigne, Glemone.
Par cualsisedi informazion baste viodi i profî social (Facebook e Instagram) de ASF Associazion Sportive Furlane o scrivi ae mail:
associazionsportivefurlane@gmail.com.
L’invît al è, par chei che puedin, di partecipâ ae FURL-RUN e sostignî la ASF che tal mont dal sport e dal Friûl e stâ tacant a fâ la diference.
Par savè di plui su la Korrika:
https://www.instagram.com/aek_korrika?igsh=MTc2bzZudWRqMjc0cA==
Vicepresidente di EFAY – European Free Alliance Youth, il gruppo giovanile di EFA/ALE – European Free Alliance/Alleanza Libera Europea.