E je nassude la Rêt Civiche Sportive Furlane

Ai 2 di Avrîl inte Sale Talotti, intal Stadi Friûl, si è tignude la conference di scree de RCSF – Rêt Civiche Sportive Furlane.

La Rêt, inmaneade de ASF – Associazion Sportive Furlane, e à l’obietîf di meti adun dutis lis realtâts civichis e sportivis furlanis par fâ grup e adun – propit in gracie de fuarce di un grup – lavorâ pe tutele, salvaguardie e promozion de identitât furlane.

Come che al à dit intal so discors di scree il President de ASF Daniele Puntel: «Il sport al è un veicul di comunicazion impuartant: al à la capacitât di meti dongje la int e lis sôs diviersitâts, e graciis a la sô semplicitât al rive a jessi comprindût di ducj.

Par chest, doprâ il sport adun cu lis ativitâts civichis tant che Pro Loco, associazions e clapis culturâls, al pues jessi un strument par veicolâ miôr e in maniere plui eficace i valôrs de identitât e de lenghe furlane, soredut intai zovins».

La RCSF – Rêt Civiche Sportive Furlane e nas daûr dal esempli virtuôs di altris realtâts che a son:

la ZSŠDI (Združenje slovenskih športnih društev v Italiji) ven a stâi la Union des Associazions Sportivis Slovenis in Italie;
la VSS (Verband der Sportvereine Südtirols) ven a stâi la Associazion des Societâts Sportivis Sudtirolesis.

Chestis associazions di associazions, come che o varês capît, a tutelin e promovin lis identitâts slovene e sudtirolese, metint adun dutis lis associazions che a rapresentin lis comunitâts linguistichis; a esistin di agnorums e cumò a varan inte RCSF un lôr corispetîf pal furlan.

Adun cu la ASF – Associazion Sportive Furlane a jerin presintis societâts impuartantonis intal panorame sportîf e culturâl furlan e che par primis a àn volût aderî al progjet:

La United Eagles Basketball Cividale: scuadre di bale intal zei, riferiment sportîf in Friûl-Vignesie Julie e che e zuie di protagoniste intal campionât talian di A2, rapresentade dal so President Davide Micalich.
La CDA Volley Talmassons: scuadre di bale a svol feminin, pont di riferiment par dute la regjon e che chest an e à zuiât in Serie A1 (ven a stâi il nivel plui alt de bale a svol in Italie), rapresentade dal so President Ambrogio Cattelan e dal diretôr sportîf Gianni De Paoli.
La IOP Madracs Udin ASD: la prime scuadre di power-chair hockey dal Friûl – ven a stâi, par cui che al è mancul espert, hockey in carocine – e associazion che e inmanee une sdrume di bielis iniziativis di inclusion par disabii tant che lis stafetis 24x1h “Metti il Turbo”, rapresentade dal so President Ivan Minigutti.
La SSD Rugby Udine Union F-VG: riferiment dal rugby udinês e scuadre che e milite intal campionât talian di Serie B, organizade suntun setôr zovanil pardabon ben struturât e atîf sul teritori, rapresentade dal so President Andrea Cainero.
La ASU 1875 – Associazione Sportiva Udinese: la associazion sportive plui antighe dal Friûl cun 150 agns di storie e di ativitât inte gjinastiche e che vuê e je un esempli virtuôs dal sport regjonâl a nivel talian e internazionâl, rapresentade dal President Alessandro Nutta.
La ASD Cjarlins Muzane: scuadre di balon di Cjarlins che e zuie in Serie D e che e rapresente il nivel plui alt dal balon diletantistic regjonâl, no dome pe prime scuadre, ma ancje pal setôr zovanil, rapresentade dal segretari Gianluca Canzian.
La Academie dal Friûl: storic circul universitari furlan de Universitât di Udin e che par tancj agns al à lavorât cetant pe culture e pal ricognossiment e l’insegnament de storie e de identitât furlane, cul so President Albert Travain.

Identitât, apartignince e condivision: chest al è stât il messaç principâl vignût fûr de serade e de conference intal Stadi Friûl.

Dut câs, la serade e je stade une ocasion par resonâ sul significat che al à vuê – intun mont che al côr svelt – il tutelâ e promovi la lenghe e la culture furlane.

Fate no a câs la dì prime dai 3 di Avrîl – inovâl de Fieste de Patrie dal Friûl –, la serade e à volût poni ancje cheste cuistion: la comunitât furlane aie ancjemò intenzion di identificâsi intai caratars salients de identitât e de culture dal Patriarcjât di Aquilee? In pocjis peraulis: aial sens, pal futûr de comunitât furlane, fâ memorie de identitât e de culture aquileiese (ven a stâi chê che o fasìn fieste ogni 3 di Avrîl)?

La rispueste no je stade semplice, ma cul jutori di Gabriele Pellizzari e dal so libri “O ricuardarai cui ch’o soi – Aquilee e il futût da la memorie” si è rivâts a vê plui clarece sul significât di componi une Rêt come chê presentade.

Prin di dut al è stât interessant spiegâ cemût che la societât aquileise e fos un lûc decisîf dal panorame ocidentâl intai siei timps.

Aquilee, di fat, e je stade une capitâl cristiane che di subit e je rivade a definî un so lessic, e i aquileiês a varan il merit di preseâ e traduzi la leterature cristiane in lenghe greche, cuant che l’Ocident il grêc nol rivave a capilu plui.
In chest sens, Aquilee e rapresentave un lûc culturalmenti decisîf che si cjalave par vê acès al savê, un lûc di formazion dulà che si cjatave il miôr de culture ocidentâl e ancje da lis tradizions cristianis orientâls dai timps.

Chê aquileise e jere une identitât che e saveve stâ cun altris, intal mieç di altris, ma che e rivave a percepisi par vê elements distintîfs, tant che alc di alternatîf e di autonom, ma intal stes timp come alc di viert e di inclusîf, bon di dâsi la sô norme, il so nomos (ven a stâi un so conotât esistenziâl specific, une sô identitât distintive).

Aquilee e il Patriarcjât a àn rapresentât par agnorums un pont di riferiment culturâl, viert, fuart e dinamic; un centri culturâl moderni e che al rivave a vê un riferiment impuartanton par dut il mont ocidentâl di chei timps.

Trop saressial interesant, in dì di vuê, pensâ al Friûl e ai furlans come a un centri di ecelence culturâl intal cûr de Europe?

Une crosere de mediazion linguistiche, multiculturâl e multietniche intal cûr di chê Mitteleurope che e à tacât a formâsi intai stes agns dal Patriarcjât di Aquilee e che vuê e viôt il Friûl intal centri de sô evoluzion.

Duncje, rispueste a la domande iniziâl: par la comunitât furlane, fâ memorie de identitât aquilese e vûl dî fâsi puartevôs di chê identitât integrade che Aquilee e jere rivade a pandi in chei timps, e vûl dî nudrî il progjet di comunitâts plurâls, agregadis, ma no uniformadis.

E vûl dî riclamâ l’obietîf ideâl di comunitâts insioradis da lis diferencis che lis componin, e no costretis a la indistinzion, a la omologazion e al nivelament culturâl che vuê magari cussì no al è simpri plui pandût.

Chest al è il motîf di meti adun une Rêt come chê presentade ai 2 di Avrîl; chest al à di jessi il stâ intal mont de comunitât furlane, il ponisi intai confronts di chês altris comunitâts.

Doprâ il furlan, promovi la storie e la culture furlane, al covente dome se si è bogns di fâ memorie di ce che la nestre tiere e je bielzà stade: un pont di ecelence e di riferiment culturâl, une crosere multilinguistiche e multietniche, vierte al mont e no sierade te sô suaze.

Alore al è facil capî che puartâ indenant un progjet cussì impuartant (ancje tal piçul dal sport e dal associazionisim) al domande che no si lavori di bessôi, ma adun, tabaiant e colaborant, vierzintsi a ducj chei che a vuelin jentrâ, in pocjis peraulis: fasint rêt.