Leç 482 e contors: pôcs bêçs pôcs dirits

La Costituzion de Republiche Taliane, in vore dal 1n di Zenâr dal 1948, tai siei principis di fonde (chei che no si puedin tocjâ), al articul 6 e dîs in mût sempliç: “La Republiche e tutele cun normis di pueste lis minorancis linguistichis”. 

Il fat al è che par dôs gjenerazions, cincuante agns, il principi nol è stât metût in vore dal Stât, di tant di fonde che al jere. 

I proviodiments, che ogni tant a vignivin fats bogns, a vevin un riferiment a acuardis internazionâi, tra stâts, e a fasevin riferiment a lenghis uficiâls di là dal confin (il francês ma nome in Val di Aoste; il sloven ma nome tes provinciis di Gurize e Triest; il todesc in Sudtirol, cu la anomalie dai ladins). Une indicazion e jere rivade de nestre Regjon e de Sardegne cu lis leçs regjonâls, te seconde metât dai agns ’90, a pro des lenghis furlane e sarde. Ma il Stât nuie! 

E je volude une mobilitazion une vore lungje e un contest politic une vore particolâr e fortunât par rivâ a une leç, che no jere il non plus ultra, ma che e tirave fûr de cjamare mortuarie il principi costituzionâl sorenomenât, ven a stâi la leç 482 dal 1999.

I agns dal gnûf secul, anzit mileni, a son stâts e a son di grant gambiament, cuntune velocitât e une radicalitât che a lassin tantis voltis scaturîts, baste pensâ ae inteligjence artificiâl. Propite par chest si varès vût, partint di chê leç, di intervegni in maniere serie, sedi in tiermins di evoluzion dal imagjinari, bandonant un nazionalisim talian, in cjamp linguistic e no, tantis voltis no cussient ma che al à fat e al fâs nome che dams, sedi in tiermins di fats, di buinis pratichis, tal cjamp de aministrazion e de comunicazion publiche e soredut tal insegnament. 

In chest cjamp chest al vâl soredut pe lenghe furlane, là che la sigurazion, par leç, che si à di garantî che i fruts a imparin la lenghe di minorance, si cjate a convivi cu la indicazion che chest si pues fâlu cuntune ore par setemane: un classic dal humour neri.

No si à fat dut chest, anzit il nazionalisim, sedi te version classiche : “Siamo in Italia e si parla (solo) in italiano”, sedi te version progressiste par finte “Ma siamo tutti uguali, parliamo la lingua comune! (il talian lenghe de umanitât)” al è plui di mode che mai. E tal cjamp pratic i è lât daûr, cun ecezions impuartantis, une superficialitât e un colâ rignuvît tal folclorisim e tal stereotip

Gjavâ i bêçs par scjafoiâ la leç

E in fin e soredut e je ancje une maniere alternative par depotenziâ une leç: dineâ i finanziaments o ridusiju il plui pussibil. Al è chel che al è daûr a sucedi tai ultins agns. Se tal 2022 il finanziament de leç al jere, par dute Italie, di passe 6.000.000 di euros e pe nestre regjon di scuasit un milion e 200 mil, chest an, in dute Italie, a rivaran un pôc plui di 2 milions e 600 mil euros e te nestre regjon 512.452, di dividi pes trê minorancis; e je une tindince che e va ancje daûr di un decret ministeriâl di programazion trienâl de fin dal 2025.

Al è clâr che chest al imberdee une ipotesi di politiche linguistiche serie. Cence bêçs no si va indenant. Il fat che cheste gnove no vedi fat plui di tant scjas: un intervent di denunzie dal Pat pe Autonomie e un comunicât dal conseîr Honsell (se al è cualchidun altri o domandi scuse, ma no mi pâr), al è preocupant. 

Ma cemût, no ise la ricjece di lenghis diferentis dal talian un element costitutîf de autonomie e specialitât de Regjon? Protestâ a Rome e/o rentegrâ lis cifris pierdudis no ise cumò la “mission” de politiche regjonâl (maiorance e oposizion adun)? Starìn a viodi.

Sperant che a cualchidun, a Rome, in non de “eficience”,  no i vegni la idee di tornâ a meti l’articul 6 de Costituzion te cjamare mortuarie.