Aureli Argemì o de unitât te diversitât
Memoreâ Aureli Argemì a doi agns de muart, tal Avrîl dal 2024, al è just par plui motîfs. Il prin al è l’agrât: chel tant che si à podût fâ e podût vê a pro dal Friûl e dal furlan al è ancje in graciis dal jutori continuât che il catalan Argemì nus à dât. Par chest al è in compagnie di altris forescj che a àn viodût te nestre tiere un element di ricjece pe umanitât e che si le viodeve ancje jessint a stâ lontan: Sergio Salvi, florentin, e Samo Pahor, sloven, par fâ doi nons tra tancj, intant che chi di nô un biel pôcs no rivin a viodile.
Ma soredut l’element macroscopic de esperience di Argemì al è il so “internazionalisim”, il fat di peâ a strent la militance a pro de sô nazion: i Paîs Catalans e de sô lenghe: il catalan al supuart a altris nazions e lenghis, tant che il Friûl e il furlan. Dut chest cuntun spirt di justizie sociâl: o ricuardi che za tal 1986 al proponeve che i guviers dal Nord dal mont a indreçassin il 0,7% dal lôr belanç ai paîs dal Sud dal mont pe lote cuintri de puaretât.
E cuntune vision de Europe pardabon “unide te diversitât”, che e scombateve une des malatiis de UE: il nazionalisim statalist, che si viodevilu continuâ sot vie par po cressi intai ultins agns.
Cuintri di chê malatie un element de terapie al jere chel de Europe dai popui e des nazions cuintri de Europe dai stâts. I disastris dal Nûfcent a vegnin in buine part de bande di cheste invenzion dal Votcent: il cussì clamât stât-nazion.
Al è dibant motivâ che cualchidun al è lât indenant fasint confusion sui tiermins di stât e nazion, che a son diferents: dispeâ chest leam sfuarçât e lis pomis invelegnadis che i vegnin daûr al è un compit dai democratics e in cheste funzion di sclariment Argemì al jere in prime linie.
Un amì dal Friûl
Nassût tal 1936 a Sabadell, dongje di Barcelone, al jentre, prin tant che scuelâr e po tant che frari te Badie di Montserrat e al vivarà la esperience di une des pocjis struturis li che la lenghe catalane no vignive perseguitade ad in plen dal regjim franchist. Ma il cristianissim regjim di Franco nol sopuarte nancje chel pôc e ancje par cheste reson al mande in esili l’abât Aureli Escarrè tal 1965.
Il so segretari al è Argemì che al ven cun lui in Italie, a Viboldone in Lombardie, e lu compagnarà fin ae muart tal 1968. Une des cuistions che i pesin di plui e je chê che, denant di interlocutôrs che a àn a cûr l’avignî democratic de Spagne, convints antifranchiscj plui o mancul radicâi, cuant che si palese la cuistion catalane lu cjalin in mût interogatîf e un pôc cu la bocje stuarte e a disin: “Ma ce robe ise cheste de Catalogne?”.
Sburtât de dibisugne di mostrâ la presince des minorancis nazionâls tal procès di liberazion de ditature franchiste, ma ancje tal panorame mondiâl de lote par un mont plui just, al decît di fondâ tal 1974 un organisim politic culturâl cun tal non chel dal abât catalan: il “Centri Internazionâl Escarrè pes Minorancis Etnichis e Linguistichis” (CIEMEN).
Il centri al publiche ancje une riviste: “Minoranze” e al reste memorabil il numar 2/3 dal 1976, jessût subit daspò dal taramot tant che “Speciâl pal Friûl”, cuntun efiet politic cetant potent.
Cul finî de ditature Argemì al puartarà il CIEMEN in Catalogne, lì che al esist inmò, al fondarà e al sarà il diretôr di dôs impuartantis rivistis “Europa de les nacions” e “Nationalia”, bandonant ancje tal 1985 la vieste di frari.
Al sarà simpri aleât cun chei che a reclamavin il dirit ae autodeterminazion pal so popul ma nol dismentearà mai la dimension almancul europeane di chês altris cuistions nazionâls, fondant struturis rapresentativis des minorancis, tant che la “Conference des Nazions Cence Stât in Europe” o proponint documents tant che la “Declarazion universâl dai dirits linguistics”; considerant la sô azion indreçade a une Europe li che come che al scriveve tal 2001 “o vin dj jentrâ, ducj adun, intune fase di ridefinizion, cence limitazions, a rivuart de identitât europeane stesse, tant che uniche alternative par fâ sù un avignî uman e e umanizadôr… Cu la convinzion clare che la uniche maniere di jessi europeans e universâi al è che ogni individui, ogni grup, ogni coletivitât, ogni popul e nazion a sedin lôr stes e si disvilupin suntun plan di reâl avualance”.
Al sarès di domandâsi ce che al disarès Argemì di cheste Europe dal 2026, sbatacolade tra politichis di grande potence e di criminalitât genocidiarie e il riclam regressîf aes “identitâts statonazionâls”.
