Diego Navarria al è nassût a Udin tal 1956 e al vîf, di simpri, a Cjarlins. Impegnât te vite sociâl, politiche e religjose de sô comunitât, al à publicât une schirie di saçs su periodics e monografiis su la storie, la toponomastiche, la onomastiche, la emigrazion, la economie, la art, la musiche e lis tradizions di chest lûc de Basse furlane.
Ae fin dal mandât di Sindic (2009-2019) e di prin President de Assemblee de Comunitât Linguistiche Furlane (2015-2019), al à tacât a scrivi contis di narative storiche in lenghe furlane, cul intindiment di fâ ingolosî il letôr a cognossi la storie grande dal Friûl.
Lis ultimis voris publicadis a son: Un sant e un re inglês a Cjarlins? tal 2021 e lis racueltis di contis Patriarcjis fûr dal ordenari tal 2021 e Patriarcjis tal cûr de Europe tal 2022. Intal 2024 al à curade la publicazion dal libri Detulis tal furlan di Fossalta.
Si à cualificât finalist plui voltis tal concors leterari “Zâl par furlan” e “Vôs de Basse”.
Tal 2022 la sô conte La confession si à classificade prime tal Premi internazionâl “Jacum dai Zeis” – contis par furlan – bandît di “Il Friuli” e de Universitât dal Friûl.
Lis sôs contis a son publicadis, mês par mês, su La Patrie dal Friûl.
