Un an di Superdizionari: la parodie de politiche linguistiche

A metât di Otubar dal 2025 la ARLeF e comunicave la publicazion tal sô sît web di un gnûf imprest pe lenghe furlane, cul non eroicomic di Superdizionari ( https://superdizionari.arlef.it/ ).

E partive daurman ancje une campagne di promozion, ancje chê cun aspiets eroicomics e demenziâi par fâ prese su la concezion di barzalete che tancj a àn dal furlan. No si sa se cheste sielte, coerente cun altris campagnis comunicativis de ARLeF, e rivi a vê un sucès di public, ma dal sigûr e devente une umiliazion in plui par une lenghe che invezit e à une bisugne vitâl di cressi di status. La promozion dal Superdizionari e à fat stât su cualchi videoclip e sul acuist sistematic di spazis publicitaris intai mieçs di comunicazion locâl (sedi di cjarte, sedi in internet, par radio e par television) che al è lât indenant par plui di un mês.

Cence contâ i fonts publics che a vevin finanziât la realizazion dai materiâi di base, la operazion dal dizionari e je costade 30.000 € pe part informatiche (curade di Ensoul) e un numar no specificât, ma alt, di miârs di euros pe campagne publicitarie.

La novitât e la necessitât dal prodot

Il Superdizionari al vignive presentât come une novitât che e cambiave di plante fûr la pussibilitât di doprâ la lenghe furlane cirint lis peraulis tal puest just, ma invezit al è dome une agregazion fate di imprescj che a jerin za di agns:

• il Grant Dizionari Bilengâl Talian-Furlan al jere za a disposizion dai furlans di plui di 15 agns, sedi intal sît de ARLeF, sedi in app par telefonuts, sedi intal sît https://claap.org (fin te Vierte dal 2025) e tal sît https://lenghefurlane.eu (dal Jugn dal 2025) cuntune buine funzionalitât;
• un toc dal Dizionari de Lenghe Furlane, curât di Sandri Carrozzo (che al è l’autôr di chest articul) e puartât indenant prime dal CLAAP, cun finanziament de ARLeF (fin al 2023) e po dai lavoradôrs e de SERLING cuant che il CLAAP al à decidût di sierâ dutis lis sôs ativitâts (par vie che la ARLeF cu la fin dal 2023 i à gjavât ducj i finanziaments): il Dizionari de Lenghe Furlane al jere za di agns tal sît https://dizionarifurlan.eu e tal moment de publicazion dal Superdizionari al veve une base di dâts vore plui grande e plui corete di chê doprade (cence nancje vê ducj i dirits) de ARLeF;
• il repertori di cognons furlans cjapât di I cognomi del Friuli di E. Costantini e G. Fantini al jere stât publicât in libri di cjarte di La Bassa/LithoStampa za intal 2011.

Duncje la digjitalizazion dal repertori di cognons e la traduzion par furlan des sôs schedis (però dome di chei de letare A ae letare L) al jere l’unic element di “novitât”. Par altri la integrazion di un repertori di cognons intun imprest di ricercje lessicâl al è un monstruum che no si cjate in nissune lenghe dal mont (tant par no lâ lontan, un utent talian laressial a cirî i cognons Rossi o Brambilla o Esposito tun dizionari de lenghe taliane?).

A chest pont la domande e je: se a jerin za a disposizion di ducj e a gratis i imprescj di https://dizionarifurlan.eu  e di https://claap.org prime e di https://lenghefurlane.eu dopo, la lenghe furlane vevie pardabon bisugne dal Superdizionari? Une rispueste tecniche oneste e je: no.

Se no i coventave ae lenghe furlane, parcè isal stât fat? La interpretazion che mi sint di dâ e je che i coventave ae ARLeF par vê visibilitât, par mostrâ ator che e fâs alc.

Par altri si pues zontâ une note: il Superdizionari nol jere previodût di nissune linie strategjiche prime dal 2024, nol jere tal Plan Gjenerâl di Politiche Linguistiche 2021-25, al è stât une idee “origjinâl” e improvise di cualchi sorestant de ARLeF.

Une cuistion di cualitât

Si pues considerâ che magari il Superdizionari nol jere une grande urgjence, ma che un imprest in plui in ogni câs nol fâs mâl. Nol fâs mâl se al funzione ben: magari cussì no, sedi dal pont di viste concetuâl che de realizazion concrete il Superdizionari al è la piês opare mai publicade inte storie de lessicografie furlane, par altri gloriose.

La rielaborazion informatiche di basis di dâts, che a jerin buinis cjapadis ognidune par so cont, e je stade fate une vore mâl, in particolâr:

• a son stâts pierdûts tocs;
• la struture e je savoltade e i elements metûts in ordin irazionâl;
• in situazions compagnis a vegnin dadis tipologjiis di rispueste diferentis;
• la presentazion grafiche, cun colôrs frêts e monotons che no judin a centrâ la atenzion sui elements impuartants, e fâs ripetizions e dispersions;
• lis basis di dâts a son obleadis a fâ funzions che no jerin lis lôr, cun risultâts paradossâi.

Cualchi esempli dai risultâts si viôt tes imagjins, altris ju segni ca:

Se si cîr dal furlan al talian peraulis come corondul, dindiat, diurint, jote, lidrichesse, udinês… il Superdizionari al dîs “La peraule che tu âs cirût no esist” (a son ducj vocabui che si cjatin cence fastidis tai dizionaris di cjarte, tant che il Faggin e il Nuovo Pirona, e in  https://lenghefurlane.eu ).

Se si cîr peraulis furlanis come bearç, muset, pignarûl, scraçule, zago il Superdizionari nol dîs nuie.

A vocabui furlans a son metudis categoriis gramaticâls faladis, par esempli cjadene, cuarde, glagn, ombre a àn dongje s.m. (sostantîf masculin); miluç, pierçul, sclopon, zîr a son segnâts s.f. (sostantîf feminin).

Te ricercje dal furlan al talian a son dispès risultâts straordenaris: agne = comare, nonna, nonno, zia (sielzêt voaltris, un al è just); mierli = fringuello, merlo, piccione (ancje ca, induvinait!); tamosse = barca; rucule = maîtresse, mammana…

Nol è un câs se il curadôr dal Dizionari de Lenghe Furlane al à difidât la ARLeF di doprâ i dâts intune maniere cussì fûr dal vade, parcè che e je une violazion dai dirits morâi dal Autôr; Giorgio Cadorini, linguist che al veve colaborât sedi te realizazion dal GDBTF sedi in chê dal Dizionari de Lenghe Furlane, al à domandât e otignût che il so non al fos scancelât dai credits dal Superdizionari par che la sô dignitât professionâl no fos sporcjade.

Dopo un an

Tai ultins dodis mês, cence nissun finanziament de ARLeF o de Regjon, https://dizionarifurlan.eu al è cressût di miârs di vocabui e al reste il sît di riferiment par cui che al dopre la lenghe furlane;  https://lenghefurlane.eu al à une gnove version dal Coretôr Ortografic Furlan e di Formari/Cuadris flessionâi; la app par telefonuts Svelt, che e je a gratis par sistemis Android e iPhone e rive a fâ in maniere ordenade e funzionâl ce che al varès volût fâ il Superdizionari: meti insiemi plui imprescj.

Il Superdizionari invezit al è simpri li: di ce che si viôt nol è stât coret nancje un dai centenârs di erôrs che a son stâts segnalâts (lis segnalazions a àn ancje vût forme di satire pesante cuintri dal Superdizionari e cuintri dai sorestants de ARLeF e de Regjon).

Il Superdizionari al è li a dînus che broade al vûl dî broda, brodaglia, cicalata, risciacquatura, a declarânus cun sigurece che tantis peraulis furlanis no esistin. Ma soredut al è li a dînus che no esistin la capacitât tecniche (linguistiche e informatiche) e la etiche te politiche linguistiche che e varès di jessi a pro de lenghe furlane e no di istituzions autoreferenziâls.