Identitât furlane… par sport! Une fevelade cun Daniele Puntel

O fevelìn cun Daniele Puntel, imprenditôr e president de Associazion Sportive Furlane, la realtât che tai ultins agns e je rivade a stiçâ dutun la passion pal sport e pe identitât furlane.

Cemût ise nassude cheste aventure?

O ai simpri vût passion pal sport, sedi di fâlu che di cjalâlu, che di lei, informâmi e imparâ. E o soi furlan, la mê identitât le sint a fuart: no ai fat grandis planificazions, o ai metût dongje chestis dôs passions e o ai tacât un pas a la volte e dopo dut al à cjapât forme e fuarce.

Il prin pas salacor al è stât chel di viodi che i nestris amîs slovens, chei de nestre regjon, a àn la lôr selezion di balon e che a zuin te Europeada: za tal 2019-20 mi soi incuriosît, po tal 2022 o soi lât a viodi la finâl a Clanfurt e li mi soi dit: “O scugnìn fâle ancje noaltris furlans une robe cussì biele!”

Alore o vin tacât pardabon a meti i fiers in aghe e ai 4 di Març dal 2023 o vin fat la prime iniziative: une partide di bale tal zei.

L’obietîf grant però e jere la Europeada, il campionât di balon di scuadris nazionâls des minorancis in Europe.

Cetant lavôr isal stât daûr? Vêso fat dut bessôi o us àno judâts?

Tant lavôr di organizazion, e bisugne di poiis par iscrivisi tal campionât: a son tantis robis di fâ.

Il prin interlocutôr che o vin cirût e je stade la ARLeF, la Agjenzie Regjonâl pe Lenghe Furlane, ma di li nol è vignût fûr nuie. Invezit e je stade fondamentâl la Societât Filologjiche Furlane: e je in graciis di jê che o vin podût partecipâ ae Europeada.

E po al è stât dut un fevelâ e un cirî di fâ capî trop che al jere impuartant: convinci lis societâts a lassâ vignî i zuiadôrs, i zuiadôrs a zuiâ cu la maie dal Friûl, e jere une robe dal dut gnove. Ma o vin cjatât une grande gjenerositât, e par ordin che a vignivin fûr i problemis, e o cjatavin soluzions e ancje chel nus judave a cressi e a fâ cressi la scuadre.

Par esempli ce sorte di problemis podevino jessi?

Par dî une: il mangjâ. La Europeada dal 2024 le vin zuiade in Gjermanie, jo no vevi pensât che il mangjâ al podès jessi un fastidi, ma tra i oraris e i prodots diviers che si cjatin tai supermarcjâts o vin viodût che nol jere tant facil e che la robe miôr e jere rangjâsi a fâsi di mangjâ di bessôi: cussì si sin organizâts. Cheste e je une robe che no jere previodude, ma che nus à dât un grant spirt di grup. E intant che si faseve di mangjâ ducj insiemi magari si fevelave e a man a man ognidun al capive simpri di plui che nol jere li par câs: o jerin li parcè che o rapresentavin un popul, che al è un popul parcè che al à la sô lenghe. Al è alc di grant.

A nivel sportîf ise stade dure?

Sì, za de prime partide, cuintri dai nestris Slovens: ae fin dal prin timp o pierdevin 2-0 e o crodevi che la nestre aventure e sarès durade une vore pôc. Po però o sin rivâts a indreçâle e o vin vinçût 4-2.

Ma la partide plui dificile e je stade tai cuarts di finâl, cuintri dai Todescs di Polonie, une scuadre pardabon fuarte: o sin rivâts a vinci 2-1.

Cun chê vitorie il grues al jere fat e o vin vinçût ancje semifinâl e finâl!

Prime partecipazion e za la vitorie: cuâl isal stât il segret?

Mah, plui che un segret al è stât tant lavôr di ducj, e tra ducj o fasarès il non dal alenadôr Mauro Lizzi, ancje plui che un alenadôr, un om carismatic e un manager, tal sens britanic de peraule. E une robe che nus à permetût di vinci e je stade ancje che o vevin une rose grande di zuiadôrs, di mût di fâ rotazions e podê fâju polsâ cuant che ur coventave.

Cambiìn di argoment, ma o fevelìn simpri di un grant sucès: la Furl-run, la corse pe lenghe furlane. Cemût ise nassude?

Gabriele Violino, che al à contats ator pe Europe al à savût de Korrika dai bascs e al à dite “Fasìnle ancje nô!”. Grandis corsis popolârs pe lenghe e pe identitât lis fasin ancje altris minorancis, i catalans, i bretons e v.i., che ancje lôr a àn cjapât di model i bascs. E cussì o vin decidût di fâle.

Ancje in chest câs e je stade une grande organizazion: une corse popolâr di Aquilee a Glemone intune dì sole no je une robe di pôc. Vêso cjapât dentri lis istituzions?

Sì, par fuarce. Ancje cheste volte o vin fevelât cu la ARLeF, e ancje cheste volte no ur è plasude la nestre idee. Salacor o varessin podût fevelâ cun cualchi assessôr, ma o vevin pôre che dopo nus imponessin chel logo “Io sono FVG” e no no volìn chê robe li, che e je antifurlane.

Alore o sin lâts a fevelâ cun ducj i comuns e cu lis associazions e li o vin vût une sorprese: o vin cjatât pardabon tancj che a fevelin par furlan e che i tegnin e o vin vût une grande partecipazion.

Le tornarêso a fâ?

Sigûr! Fate une volte o vin ancje imparât cuâi che a puedin jessi i grops dûrs di distrigâ e ce che invezit al jude. L’an che al ven o viodarìn di tirâ dentri ancje lis scuelis e ancjemò plui associazions.

La Furl-run e je deventade virâl ancje a nivel internazionâl: e je finide ancje tai gjornâi in Catalogne. Cemût isal sucedût?

Un pôc par câs, un pôc par vie che si viôt che al veve di sucedi. Tra lis “personis imagjin” de Furl-run o vin vût Ada Bier, di Midun, che e à vivût un pôcs di agns intal Paîs Basc, e à corût ancje la Korrika e e à tancj contats cu lis minorancis che a son in Spagne. Cuant che a son vignûts fûr in Instagram videos di jê te Furl-run e in particolâr cuant che e leieve il test ae fin de corse, a àn tacât a deventâ virâi, e soredut i catalans a àn cjapade tante curiositât pe nestre lenghe e à àn fevelât di “lenghe sûr dal catalan” ancje tai gjornâi. Une biele sodisfazion, e une dimostrazion in plui che se si lavore ben, i risultâts a rivin.

E ancje une dimostrazion in plui, se mai e coventave, che lis lenghis e il sport a unissin i popui.

E propit cheste domenie e sarà une gnove iniziative di competizion-union tra popui: la amichevule di balon tra la selezion furlane e chê groenlandese. Cemût ise vignude fûr cheste idee?

Scuasi par ridi: al jere Trump che al diseve robis fûr dai semenâts su la Groenlande e cussì o vin mateât che o varessin fat une partide di balon di solidarietât pe indipendence dal popul groenlandês. In principi al jere pardabon un scherç, ma al è stât cjapât sul seri ancje di esperts di gjeopolitiche e alore o vin dite: “Fasìnle pardabon”. O vin cjapât contats e fat dut ce che al coventave e le zuiarìn, a Manzan.

E alore l’apontament al è propit domenie ai 31 di Mai,  aes 18.00 (ma a saran iniziativis za des 17.00) a Manzan, tal Stadi Comunâl di vie Olivo 8: amichevule di balon Friûl-Groenlande.