Teôr: e je achì la fieste dal popul furlan

Se o vessin di contâle, e pararès un cine. Inalore o provarai a butâle jù come une senegjature.

Avost dal 2019

O jerin in cuatri a gjoldisi i frêts de aghe tal glereâl dal Tiliment in zone Fraforean, là che la rudine e lasse il puest ai prins bancs di savalon. Il Green Volley Teor al jere a pene passât, cun dut il lavôr che nus tocje tra preparâlu, po meti a puest, e, soredut, vivilu e fâ che al ledi ben. A son moments impegnatîfs che tant ti tegnin in chê biele vie di mieç tra la juste tension e la ansie di prestazion, par un event che cetancj di lôr a spietin e no tu puedis deludiju, e tant ti gjavin a nivel di fuarcis fisichis e mentâls. Si che duncje zornadis di pucefadiis nus coventin par mondâsi da la fature, tant che rituâl catartic. Al è cun chest spirt che si fasin ancje i prins, parziâi, belançs de manifestazion e si prove a butâ jù alc pal futûr, cence il pês di une scjadince iminente. E come che dispès nus sucêt, tal nuie ce fâ a rivin lis ideis miôr.

Distirâts sul savalon, denant al barlumâ de aghe, si tache a dî trop biel che e sarès une fieste interie a teme Friûl e pensade pai Furlans, magari in ocasion de Fieste de Patrie.

Si sa che cuant che une robe tu tachis a dîle, jê e tache a cjapâ forme e pôc dopo ancje vite. O varìn di proponilu a dut il diretîf, ma o savìn za che la fieste si fasarà.

Fevrâr dal 2020

La fieste di Carnevâl e sarès stade ae fin dal mês e dopo e sarès tocjade ae prime “Fieste furlane”. Tantis ideis tal cjâf, che tal timp si jerin insioradis dal benstâ di dute la Pro Loco Teor e dal dialic su cemût organizâ al miôr la prime nestre “Fieste furlane”. La somence e veve cjapât e aromai la plante e jere scuasit pronte a sflurî. Ancjemò al restave un problema no di pôc cont: il just non pe manifestazion. O varessin vût, dut câs, altris trê setemanis plui o mancul prime de publicizazion dal event par cjatânt un di sest, parcè che “Fieste furlane” nus saveve di lami oltri che di banâl.

Sul plui biel, però, il taramot dal Covid nus à crevât chês pividis prontis a sflurî. A larin su pal stec sedi il “Carnival party” che la “Fieste furlane”.

Nissun al varès crodût che chest taramot si sarès slungjât cetant, fintremai a fâ i conts no dome cul Covid e vonde, ma ancje cun dute chê fase che par semplicitât o clamarai post-Covid e che tant e à rindude dificile la vite come che le cognossevin. Inutil dî trop che chei mês a vedin metût in zenoglon la stesse Pro Loco Teor viodintsi disparî ducj i events in calendari pai prossins doi agns, cul risi di disparî ancje jê.

Lui dal 2023

A passarin 3 agns e par fortune la situazion e tornà di gnûf ae normalitât. Dopo vê ricjapât il sbris a organizâ events a plen regjim, si sintirin pronts par tornâ a cjapâ in man il discors pe “Fieste furlane”. L’obietîf al voleve jessi chel di creâ une fieste gnove che e costituìs la ocasion par rinsaldâ i leams dai Furlans cu la lôr tiere di origjine e la lôr identitât. E je vere che lis celebrazions dai 3 di Avrîl za si fasevin, però e je ancje vere che un limit, a gno parê, da la Fieste uficiâl de fieste de Patrie al è chel di vistîsi masse di istituzion, slontanant i tancj che magari intune otiche dal gjenar o no si viodin o che no le cognossin, clamant invezit adun dome chei pôcs che za a san il parcè de esistence di cheste zornade. Il nestri obietîf al sarès stât ecumenic e universâl viers dute la furlanie: chê consapevule de identitât e chê no, chê scuelade su la nestre storie e chê no, chê che no si rint e e crôt ancjemò tune idee di un Friûl libar e indipendent e chê dome curiose. 

A dutis chestis curints i varessin zontât la categorie plui vitâl di dutis: i zovins. Di fat, la robe plui avilente des Fiestis de Patrie e je la complete mancjance di fruts, fantacins e zovins. Ise pensabile une fieste che e vorès stiçâ la vitalitât di une nazion cence zoventût? Salacor cheste e je stade la riflession che plui di dutis nus à sbruntât a provâ, tal nestri piçul, a gambiâ lis robis, a invertî la tindince.

Po dopo al è stât ancje un segn dal destin a confermânus che chel che o vevin tal cjâf ancje cualchidun altri sal auspicave. A Mai a Udin si jere davuelzude la 94^ Adunade dai Alpins cun cetant sucès. A viodi ducj chei tricolôrs e chê gjonde in fieste a nasserin ancje, justamentri, dibatiments e riflessions su la riesside de fieste. In particolâr cuntune vene di malinconie Walter Tomada sul editoriâl da “La Patrie dal Friûl” dal mês di Lui dal 2023 si domandave: “Cuant vignaraie la “adunade” dai furlans?”.

Une folgorazion: a fevelin di nô! Chel intervent al è stât par me une leture iluminante tal sens vêr de peraule, no alegoric: iluminante no tant parcè che responsabile di fâ vignî a ments une gnove idee, ma pluitost buine di fâ lusôr par sclarî une idee che e esisteve bielzà. O vevin, di fat, apene cjatât il non perfet. O miôr nus al veve cjatât Walter Tomada, che ancjemò une volte o ringracii. “Adunade dai Furlans” al va di là di un biel slogan, ma al puarte daûr di se un significât di agregazion e comunance tra personis che si sintin leadis par cualchi reson. Tal nestri câs la identitât: jessi il stes popul, chel furlan.

Prime e seconde Adunade dai Furlans: ducj a Teôr!

Ai 6 di Avrîl dal 2024 finalmentri e rivà la date de prime storiche “Adunade dai Furlans” a Teôr cuntun sucès di là di ogni nestre aspetative. La sperance e jere chê di creâ lis fondis par une ricorence anuâl di davuelzi dongje de date storiche dai 3 di Avrîl e par cumò lu vin ancje rispietât organizant ancje la seconde edizion ai 5 di Avrîl dal 2025. Une des robis che plui nus à fat plasê e je stade la fuarte partecipazion propit de bande da la int dal paîs o des nestris bandis, a dimostrazion da la nestre scomesse: ancje cui che no si pense, i ten a la Furlanetât e al à braure de sô origjine, e baste dome dâi ocasions di manifestâ chest sentiment in maniere popolâr. In cont di chest, no vin snaturât nancje la nestre filosofie di events: divertîsi e fâ fieste, cu la convinzion che ancje in cheste maniere si puedi fâ cognossi lis nestris Storie, Lenghe e Culture. Cussì o vin pensât prin di dut ai rapresentants des edizions: Catine come madrine da la prime, Claudio Moretti come ambassadôr de seconde. 

Po dopo di struturâ la fieste cuntun prin moment culturâl di conferencis (Roberto Venturini, Paolo Paron e Teresa Pitton, Diego Navarria, Agnul Floramo, jo) cun chioscs simpri atîfs e un marcjât di artesans e produtôrs furlans. Tal spietâ la serade cun conciert e djset (claramentri cun artiscj furlans: Côrs di Teôr e di Rivignan, Discostajare, Doro Gjat, FLK, Frankie & Bosco), no si sin dismenteâts dai plui zovins. Un dai obietîfs al è stât chel di coinvolzi in maniere trasversâl gjenerazions diviersis, dant simbulicamentri inizi a un circul virtuôs che al podedi e al savedi inzornâsi ancje ta lis edizions futuris, soredut gracie al apuart di zovins e zovinis furlans. Cussì pai plui piçui o vin proponût un spetacul par cure dal Teatri Stabil Furlan cun tant di mirinde organizade de Terre del Friuli–Venezia Giulia e i zûcs di une volte e pai plui grancj, aromai zovins oms e zovinis feminis, la consegne des Costituzions voltadis par furlan e des bandieris furlanis cu la poie e il supuart de Aministrazion Comunâl. Un môt par stiçâ ancje tai gnûfs adults la lôr identitât prin furlane che taliane.

Ta dutis chestis robis o sin rivâts adore ancje a puartâ ben, stant che par prins o vevin invidât sul palc de “Prime Adunade dai Furlans” la Associazion Sportive Furlane par contânus dal sium di partecipâ ae prime Europeada de nazionâl furlane di balon e ta chê dopo a son tornâts a dînus in ce maniere che al à vinçût propit il Friûl! 

E po dopo o vin mangjât e bevût e stâts insiemi, come che e previôt une vere adunade.

E se ta lis dôs edizions ancje dome une persone, frut o grant che al sedi, si è fat une domande su la furlanitât e si à dismot un alc drenti, inalore la mission e je compiude e nô no vin intenzion di fermâsi, parcè che o soi cunvint che cuant che i Furlans a cognossaran la lôr Storie, o sarìn un Stât libar.