Identitâts e autonomie

Plui di cualchi volte si sint a fevelâ di “invenzion de identitât”: cualchi volte si assegne cheste etichete aes identitâts che si metin cuintri de centralitât dal stât nazionâl, ma i esemplis plui tipics a son propit chei dai stâts nazionâi e la Italie e je pardabon un câs di manuâl.

Lis popolazions cjapadis dentri tal teritori de Italie a son caraterizadis di secui e milenis di diferencis e divisions storichis, politichis, sociâls, culturâls e linguistichis, ma tal dâ dongje il stât talian si à decidût no di creâ une identitât cumulative, che e partìs de realtât dai fats e che e zontàs valôr cun valôr, ma une identitât monolitiche, cristaline, esclusive e duncje, in sostance, superficiâl e false.

E je stade la imposizion nazionaliste di une identitât uniche, di une lenghe sole, di riferiments storics strumentalizâts e falsificâts cun incoerencis straordenariis, che une leture a pene plui atente e met in evidence. Par esempli:

• la “epopee” risorzimentâl e à puartât al domini de monarchie sabaude, che e jere francese come e plui dai Borbons o di altris dinastiis che a son stadis pituradis come forescj che a dominavin tocs di Italie;
• il sacrifici de prime vuere mondiâl: al è stât un crimin des autoritâts e une vergogne irazionâl dai interventiscj des diviersis fazions, ma al ven presentât come moment positîf de creazion di un spirt nazionâl talian;
• la resistence e la vuere di liberazion “nazionâl” 1943-1945: di nazionâl a vevin dome un pocje di confusion retoriche, di fat a vevin, tal stes moment, i caratars essenziâi de vuere civîl (resistence taliane cuintri fassisim talian) e dal fenomen internazionâl (aleâts e partigjans di dutis lis nazions cuintri nazifassiscj di dutis lis nazions).

In struc la identitât taliane uficiâl, no si fonde su la realtât positive di diversitâts e di ricjece, ma su la semplificazion false e agressive. Cheste sielte no je stade fate tant par resons culturâls (che al massim a àn furnît une puare justificazion: lassâ indaûr e scancelâ lis diferencis, par vie che a son une testemoneance di timps di division, umiliazion e dominazion foreste), ma plui di dut par imitazion cussiente o incussiente dal model nazionalist francês, par interès des autoritâts di gjestî la semplicitât e no la complessitât, par interès dai capitaliscj di creâ economie di scjale.

Cheste identitât inventade, semplificade e falsificade, in plui di jessi stade doprade par vêrs crimins (prin di dut pes vueris) e je al servizi de diestre autoritarie e dal centralisim, sedi di diestre che di çampe.

Identitats e centralisim

A chest nivel al è fondamentâl che une fuarce politiche autonomiste no dome si meti in oposizion politiche e aministrative a un sisteme centralist, injust e ineficient, ma che e ciri ancje tes identitâts reâls e complessis lis fondis de sô esistence e une des critichis plui fuartis al nazionalisim.

Par che cheste ricercje e vedi un sens, si à di vê une precauzion: prin di dut si scuen liberâsi dal esempli metodologjic nazionalist, no si pues creâ une identitât uniche, monolitiche e false locâl che e contrasti cu la identitât uniche, monolitiche e false taliane (cheste operazion si pues lassâle a un ipotetic moviment autonomist di diestre, che però in Friûl o nol è o si plee ai interès dal sisteme centralist).

Si à di partî de realtât, de complessitât: si à di fâ un lavôr di studi, cognossince, scuvierte e riscuvierte di alc che al ven platât e disfat dal sisteme uficiâl.

La identitât no je uniche e esclusive: e je par sô nature multiple e stratificade, e partìs de famee, dal borc, dal paîs, par passâ par comunitâts teritoriâls plui o mancul piçulis (par esempli chê cjargnele, chê bisiache…) a chês plui grandis (par esempli chê furlane), a chês di dimension istituzionâl statâl (par esempli chê taliane), sorestatâl (par esempli europeane) e v.i..

La mission identitarie di une fuarce autonomistiche positive e je prin di dut chê di cognossi e di valorizâ cheste varietât e stratificazion, cence pôre di movisi te complessitât.

E covente cognossince, interpretazion e elaborazion des identitâts, che a son il leam plui fuart aes comunitâts e ai teritoris: a son l’element plui fuart par fâ che la difese de autonomie no deventi dome burocratiche e eletorâl, par che no deventi dome la oportunitât par cualchi ambiziôs di riciclâsi o di cjatâ la sô cjadree personâl, par vendisi un doman ai plui potents.

A coventin une vore di impegn, fadie e lavôr: ma chest al è une consecuence obleade de sielte de autonomie, che e je la alternative responsabile ai sistemis plui facii, semplificâts, ma criminâi, dal “credere, obbedire, combattere” o dal “produci, consuma, crepa”.

Identitâts falsis e siglis vueidis par copâ lis identitâts veris

Par recuperâ il contat cu la autenticitât nol baste dome capî che la identitât, come la autonomie, e tache dal piçul e e va sù di dimension a man a man, ma bisugne ancje rindisi cont che par distruzi cierts nivei di identitât vere e preziose (prin di dut chê furlane e chê slovene) a son stadis fatis par desenis di agns e a van indenant ancje vuê campagnis di falsificazion, erosion e divuedament.

Par fâ un esempli di falsificazion si scuen tacâ de “Venezia Giulia”, che no à nissune fonde storiche o culturâl e che nissun sa ni dulà che e tache ni dulà che e finìs; po si pues viodi che il cuotidian di riferiment dal Friûl, fondât dopo de seconde vuere mondiâl cun fins nazionaliscj talians e antiautonomiscj, si clame ancjemò vuê “Messaggero Veneto” (daûr des ecuazions venit = talian; furlan ≠ talian).

Pe erosion al baste pensâ che il Friûl ocidentâl, te RAI e tai mieçs di comunicazion di sisteme, nol esist: al è la “Destra Tagliamento”; chel che al è simpri stât Friûl orientâl, nol esist nancje chel: al è “Isontino”. I furlans che a vivin di chês bandis no vegnin mai clamâts furlans.

Pal disvuedament di identitât si pues cjalâ l’ûs de denominazion de regjon, che za e jere nassude mâl “Friuli – Venezia Giulia” (il so non naturâl, se si veve di fâ une regjon cussì, al veve di jessi “Friûl e Triest”) po al è lât indenant piês, gjavant la distinzion segnade dal tratut e deventant “Friuli Venezia Giulia” e cumò al è rivât ae promozion/imposizion dal pustiç “Io sono Friuli Venezia Giulia” che si disvuede ancjemò di plui in “Io sono FVG”, che al è come dî “jo no ai nissune identitât, no mereti nancje un non, o soi dome une sigle”.

Cui bêçs dai furlans, dai triestins, dai slovens e se si vûl dai bisiacs, dai cjarsulins, dai cjargnei, dai roseans, dai gurizans, dai spilimberghês e v.i. si fâs no promozion, ma distruzion de realtât identitarie locâl.

E il fat che cheste operazion e sedi un gjenocidi culturâl al servizi dal centralisim talian, al è confermât de presince iconografiche di un biel tricolôr nazionâl talian.

Cemût che si sa, il nazionalisim talian nol è une esclusive de diestre, ma al è condividût, par resons che a meretaressin un studi dut par so cont, ancje di buinis fetis dal eletorât e de classe politiche de çampe in Friûl, a Triest e in dute Italie.

Chest al fâs che e sedi ancjemò plui urgjente e impuartante une funzion che o pensi che il Pat pe Autonomie al scuegni vê: no dome al à di tornâ a cognossi, elaborâ e puartâ indenant lis identitâts, ma ancje di puartâ un resonament critic su chescj temis in dute la aree progressiste e, in câs in forme di contrast, in dutis lis fuarcis politichis.