Il Pat De Gasperi-Gruber otante agns daspò e la necessitât di une “Zornade de Autonomie”

Ai 5 di Setembar dal 2026 il President de Republiche Taliane Sergio Mattarella e il so corispetîf austriac Alexander Van der Bellen si son cjatâts a Meran par memoreâ i otante agns de firme dal Acuardi di Parîs. Cognossût ancje come “Pat De Gasperi-Gruber” parcè che al fo firmât dal President dal Consei di chê volte, Alcide De Gasperi, e dal Ministri dai afârs forescj austriacs Karl Gruber, chest acuardi internazionâl al à definît il status dal Sudtirôl dentri de Republiche Taliane e al à marcât la prime piere pal disvilup de sô autonomie. Pûr jenfri lûs e ombris, l’inovâl al à compagnât la storie resinte de regjon, e dal 2014 al è al centri di grandis celebrazions che la Provincie Autonome di Bolzan e inmanee sot dal non di “Zornade de Autonomie”.

Il program siôr di chest an si vierzeve ai 3 di Setembar cuntune conference metude in pîts da lis mês ex coleghis di lavôr dal Centri di storie regjonâl di Bressanon / Zentrum für Regionalgeschichte Brixen, e dedicade ai aspiets mancul cognossûts dal Acuardi, massime lis sôs consecuencis pe economie trentine-tirolese e lis “riopzions”, ven a stâi la pussibilitât par plui di 200.000 sudtirolês di tornâ a vê la citadinance taliane, dopo che le vevin pierdude daûr de Opzion pe Gjermanie dal 1939. Jo, impen, o ai podût fevelâ dai efiets dal Acuardi fûr dal Sudtirôl, o ben te Val Cjanâl – che e veve vût un destin compagn dal Sudtirôl par chel che al inten la anession e la italianizazion – e inte plui largje regjon alpine-adriatiche. Cence dubi, la cunvigne e je stade un sucès, tant che o sin rivâts a cuvierzi ducj i grups linguistics sudtirolês; jo stes o soi stât intervistât par talian, par todesc e fintremai par ladin. 

Lis consecuencis dal Acuardi in Valcjanâl, in Friûl e inte regjon Alpe-Adria

Il limit teritoriâl dal Pat nol permet di tabaiâ, in cont de autonomie politiche, di “impats reâi” fûr dal Sudtirôl. Diferent, però, al è il câs des “riopzions” e des facilitazions che a tocjavin il trafic di frontiere jenfri Tirôl, Sudtirôl, Trentin e Vorarlberg, cognossudis tant che “Accordino”. Lis primis di fat a valevin par ducj chei che a vevin optât, cjapant dentri ancje oms e feminis de Valcjanâl. Lis secondis a podevin jessi interpretadis tant che riferidis a dut il confin talian-austriac, e par chest a àn influençât lis realtâts economichis furlanis, slovenis e carinzianis, che a àn cirût di meti in pîts alc di simil. 

Inte Valcjanâl dal 1945-46, il scomençament de Vuere Frede, la compresince di personis che si identificavin tant che “talians”, “todescs” o “slovens”, i seris mudaments demografics, lis aspirazions nazionâls contrariis, i progjets di anession jugoslâfs e lis sburtadis par tornâ te Austrie a vevin produsût une situazion une vore complicade. Cun dut des iniziativis di chei e chês de Valcjanâl trasferîts in Carinzie, che a vevin cirût di tirâ dentri la Südtiroler Volkspartei, il guvier carinzian, chel di Viene e fintremai la aministrazion militâr inglese par viodi ricognossude la protezion des minorancis, la Valcjanâl e jere restade leade cun fermece ae Provincie di Udin, val a dî fûr de aree che ancje i Aleâts a calcolavin contestade, e cence trataments speciâi. Cun di plui, par vie che la cuistion de autonomie de regjon Friûl-Vignesie Julie che e jere daûr a nassi e jere stade rimandade sine die, ben pocjis fameis a vevin decidût di tornâ.

Se, duncje, il ricors ae “riopzion” al fo scuasit nul, il stes no si pues dîlu pe influence dal Acuardi di Parîs in rispiet al disvilup dal scambi economic a Est dal Brennero. Doi mês dopo de firme dal “Accordino” trentin-tirolês intal Mai dal 1949, lis Cjamaris di cumierç di Udin, Lubiane e Clanfurt a vevin za tacât a fâ pression ai lôr rispetîfs guviers par replicâ il scheme. A jerin rivâts une vore a fonts e, intun cuadri di normalizazion e graduâl recupar de cooperazion, a vevin insumiât une aree doganâl privilegjade a scjavaç dai trê cunfins, intant che Tarvis al tacave la sô trasformazion in zone comerciâl. A dispiet di chest, a forin i austriacs a frenâ, pôcs agns dopo. Pai esecutîfs di Viene no si podeve fondâ areis economichis favoridis taiant i Länder, e, cun dut che i slovens a varessin tentât plui voltis intai decenis seguitîfs, i austriacs a sierarin simpri lis puartis aes discussions. Intai agns Setante al fo fintremai il Cancelîr austriac Bruno Kreisky a dî che l’Accordino al vignive jù dret dal Acuardi De Gasperi-Gruber e che al rapresentave un unicum iripetibil. Al fo duncje necessari cjatâ soluzions alternativis e, jenfri acuardis fieristics, facilitazions al passaç des frontieris (come la famose propustnica) e sfuarçs comuns tra Friûl-Vignesie Julie, Carinzie e Slovenie, la triple frontiere e divignì intai agns Sessante e Setante “il confin plui viert de Europe”. 

La necessitât di une “Zornade de Autonomie” in Friûl-Vignesie Julie

Di là des riflessions storichis, al somee clâr che l’otantesim inovâl dal Acuardi De Gasperi-Gruber nus interoghe ancje sul significât atuâl de autonomie. A Meran, Mattarella al à ricuardât cemût che il Pat al vedi rapresentât “la vitorie de diplomazie parsore des contraposizions” e chê dai “valôrs democratics parsore de fuarce”, mudantsi intal timp intun model di protezion des minorancis e di convivence. Al è ancje par chest che une “Zornade de Autonomie” e varès sens soredut chi in Friûl-Vignesie Julie.

Al podarès someâ un paradòs, ma la storie de autonomie regjonâl e nas prime di dut in Friûl. Jenfri 1945 e 1948, intant che l’avignî di Triest al restave inciert e une sô separazion definitive dal Stât talian dut fûr che improbabil, il dibatiment regjonalist si jere concentrât su la pussibilitât di ricognossi une “regjon furlane”. In chês circostancis no si tratave nancje di discori jenfri regjon ordenarie e speciâl, ma dome di dimostrâ une specificitât rispiet al Venit. E jere, pal rest, une stagjon di straordenarie vitalitât dal regjonalisim talian. De Sicilie ae Val di Aoste, fintremai aes diviersis esperiencis autonomistichis dal arc alpin nassudis de lote partigjane, la costruzion dal gnûf Stât democratic e nudrì sperancis di decentrament e autoguvier che la pôre di sburtadis centrifughis e ridimensionà in pôc timp. 

In Friûl, chel dibatiment al veve cjapât dentri figuris tant che il “pari” de regjon Tiziano Tessitori, ma ancje Pier Pauli Pasolini, Gianfranco D’Aronco e altris, che a varessin dât vite intal 1945 al Moviment Popolâr Furlan pe Autonomie. Chest al fo un grant laboratori, cun centenârs di aderents jenfri Udin, Pordenon e Gurize. Il Moviment, però, al fo soredut il principâl interlocutôr de ASAR, l’Associazione per gli Studi Autonomistici Regionali del Trentino, che intal stes timp al stave colaborant ae stesure dal prin Statût Speciâl dal Trentino-Alto Adige (in chê volte no si clamave Sudtirôl in maniere uficiâl). Jenfri dai esponents dai doi moviments il feeling al fo sclet e adun a coordenarin adun une grande “federazion des autonomiis alpinis”. 

Al fo alfin Tessitori, al 27 di Jugn dal 1947, a otignî de Costituent di zontâ il Friûl-Vignesie Julie intal grop des regjons a statût speciâl. Metint dongje lis insistencis regjonalistichis furlanis cun chês triestinis, ae classe dirigjente locâl al si prospetà cussì il dovê grivi di integrâ chestis dôs polaritâts intune struture aministrative unitarie e di fâ sù une regjon pardabon straordenarie, al centri de gnove Europe.

Juste il 27 di Jugn al è stât proponût che nol è tant dal Pat pe Autonomie pe istituzion di une Zornade regjonâl dedicade al autoguvier. Celebrâle al volarès dî no dome memoreâ un Statût ma recuperâ une memorie publiche de autonomie tant che progjet democratic, nassût dal bas e inlidrisât inte storie politiche dal teritori. Il Pat De Gasperi-Gruber al varès influençât a dilunc chescj lengaçs e al conserve ancje in dì di vuê il so valôr plui profont: fâ viodi cemût che teritoris plurilengâi e di confin e puedin mudâ conflits nazionâls, diferencis linguistichis e frontieris politichis in imprescj di tutele e cooperazion.  

Conclusions

Forsit e je propit cheste la lezion che il F-VG al varès di tornâ a fâ proprie. La fuarce di cheste regjon – come che al è stât dit plui voltis in chest gjornâl – no je mai stade la omogjenitât, vendude vuê intal sproc lami FVG, ma il so contrari. I aspiets che a fasin unic chest teritori a son il jessi policentric, lis fraturis, lis identitâts soreponudis e il jessi simpri “di stuart” in riferiment aes categoriis aministrativis che a cirin di contignîlu. Se pardabon il Friûl, Triest, il Cjars, lis comunitât slovenis, lis areis di lenghe todescje e lis vilis di lenghe venite e son vuê la reson de specialitât regjonâl, alore al covente judâlis a tignî bot cuintri de semplificazion. Une “Zornade de Autonomie” – salacor cuntune esposizion permanente come che al è stât fat a Trent e a Bolzan – al varès sens propit par memoreâ chestis particolaritâts, nassudis inte diference e tornadis a componisi in maniere democratiche intune autonomie che no je mai cuintri cualchidun ma ben di dutis e ducj.