Imparâ furlan a scuele: (o)mission impussibile

Ancje cun chest Setembar dal an 2024 e je tornade a tacâ la scuele. Une scuele dulà che, ancje chest an, no si impararà il furlan.

Intal 1949 Josef Marchet, intun dai siei editoriâi de Patrie dal Friûl al scriveve: “La storie di ducj i lengaçs, vîfs e muarts, nus insegne che par salvâ il furlan di une muart sigure, par fermâ la sô agonie, par meti ancjemò un fregul di sanc tes sôs venis, al è nome un rimiedi e nome un mieç: fâlu insegnâ tes scuelis”

A son passâts trê cuarts di secul, e la analisi di Marchet, che e merete lete dute interie, e je ancjemò vere.

Magari cussì no, e je ancje lontane di jessi sodisfate, cundut che la leç dal stât 482/99, tal articul 4, e fissi che lis lenghis minoritariis, e tra chês il furlan, a àn di jessi dopradis ancje tant che lenghe di insegnament, e che al à di jessi garantît il lôr aprendiment (no dome che si insegnin, ma che si imparin).

In plui de leç 482/99, dal 2007 e je ancje la leç regjonâl 29, che tai articui 12-18 e puarte gnûfs elements che a saressin une vore positîfs, ancje se cun pocje fuarce reâl, stant che la Regjon no à competence primarie su la scuele.

Tal concret, però cemût che a san ducj chei che a vedin fruts, il furlan a scuele si insegne pôc, dispès si insegne mâl e soredut no si pues imparâ.

Cuantitât di oris di insegnament

Si è rivâts a definî la cuote di furlan in 30 oris ad an: nol covente sei un espert di didatiche par capî che cun trente oris ad an no si pues imparâ nissune lenghe dal mont. Cun di plui al pues sucedi che in chês ore si fasin juste dôs cjançonutis o che si feveli, par talian, di tradizions di une volte… La uniche soluzion e sarès di doprâ il furlan come lenghe veicolâr intun bon numar di materiis, almancul pal 50% dal orari di scuele, ma chest fin cumò nol è mai sucedût.

Cui insegnial il furlan?

Tal 2012, ancje par meti in vore l’art. 17 de LR 29/2007, si istituive une liste regjonâl uficiâl di insegnants di furlan. Cundut des buinis intenzions di cheste iniziative, la preparazion dal personâl no je mai stade garantide: par jentrâ te liste e bastave, e e baste, une declarazion li che l’insegnant al dîs di vê fat un percors formatîf (cence distinzion: al pues jessi un master de Universitât di Udin di 500 oris, o un cors di paîs di 20 oris…) o, ancje cence nissun percors formatîf, di vê fat tai agns prime cualchi ativitât didatiche di furlan o par furlan (cence nissune verifiche di cualitât o nancje di corispondence cu la realtât). Un criteri cussì pôc seletîf al permeteve di rivâ a vê un grant numar di “insegnants di furlan” (vuê a son scuasi 2000), ma che pe plui part no savevin furlan. In 12 agns chescj insegnants no son stâts puartâts a un ciert nivel di competence, no si è trasformade chê liste intun coletîf che al ves une vere condivision di cognossincis e professionalitât.

L’ostacul principâl ae verifiche de lôr competence al è che il sisteme di certificazions, previodût par leç za dal 2007, nol è in vore, cemût che o vin za scrit. (*)

Cui controlial i risultâts?

La LR 29/2007, articul 15, come 4, e dîs a clâr: “In collaborazione con l’Ufficio scolastico regionale, l’ARLeF verifica e valuta annualmente, secondo modalità concordate, lo stato di applicazione dell’insegnamento e dell’uso della lingua friulana nelle istituzioni scolastiche, la ricaduta sulle competenze degli studenti e la risposta delle famiglie.”

Dal 2012-13 la Regjon Friûl-VJ (cumò midiant de Direzion centrâl lavôr, istruzion e famee – Servizi istruzion, orientament e dirit al studi) e à destinât une sume di bêçs che in medie e je stade di 1,5 milions di euros ad an, par ripaiâ i docents de ativitât di programazion e di lezion domandade dal insegnament dal furlan. In 12 agns no je stade fate nissune verifiche cualitative dal efiet di chest invistiment: i uficis dal Servizi istruzion, orientament e dirit al studi a fasin une verifiche de coretece procedurâl e contabile de spese, ma no dai risultâts didatics, par vie che no àn la competence di fâle. La verifiche dai efiets didatics i tocje ae ARLeF, ma invezit, par ce che si sa, la ARLeF e à sielzût di ripeti un control burocratic e procedurâl che al jere za stât fat dai uficis responsabii dal finanziament aes scuelis: in struc, a nivel regjonâl, la regolaritât burocratiche e ven verificade dôs voltis, il risultât reâl dal aprendiment nancje une.

La mancjance di risultâts

La “realtât burocratiche” e je cheste: a son ogni an passe 34.000 fruts (de scuelutis fin aes mediis) che a fasin furlan a scuele. Daûr de “realtât burocratiche” il 60-70% dai fantats fin a 18 agns al à fat dut il percors didatic previodût par furlan: duncje dal sigûr il furlan lu san e magari ancje lu doprin.

La realtât sociolinguistiche invezit e je che inte fasse di etât dai fantats la percentuâl di chei che a disin di fevelâ furlan e je, daûr des stimis plui otimistichis, dal 20% (e une grande part di chest 20% magari al dîs dome “mandi”): une vore di mancul che no lis gjenerazions un pôc mancul zovinis, che no vevin il furlan a scuele par leç, che a cjase za lu fevelavin une vore pôc, ma che a àn vût mût di imparâlu dopo, in ocasions sociâls (lant ator pes sagris, morosant, fasint sport, a vore…).

Dentri de fin dal an la ARLeF si è impegnade a publicâ i dâts de inchieste sociolinguistiche gjenerâl “Tire fûr la lenghe”, che e à za dal mês di Mai, e si podarà vê dâts uficiâi e fâ deduzions numerichis precisis. Par intant però nol è un azart dî che dopo 25 agns di L 482/99, 17 agns di LR 29/2007 e 12 agns di impegn finanziari diret de Regjon, l’impat sul aprendiment dal furlan tes gjenerazions zovinis al è stât “zero”.

Al è clâr che la scuele no je la sole responsabile de situazion sociolinguistiche, però al è ancje clâr che e je stade une omission sistematiche a plui nivei (insegnants, diretôrs didatics, Ufici scolastic regjonâl, ARLeF) te verifiche dai risultâts, e che no je stade la volontât di cjatâ ce che nol funzione e di procurâ di comedâ.

Conclusions

Chest articul nol vûl mortificâ chei pôcs insegnants che si son sfuarçâts di creâsi un percors professionâl e che a metin cûr e cjâf par cirî di puartâ il furlan a scuele. Par fortune a son, ma si à di rindisi cont che a son pocjis ecezions intun sisteme che nol funzione.

Chest articul nol vûl nancje dâ une scuse ai antifurlans par dî che si à di gjavâ ducj i bêçs dal furlan, che a son dome butâts vie: anzit, a coventin invistîts plui bêçs, ma soredut a coventin invistîts cun sintiment e lant a viodi il lôr efiet reâl.

Al covente vignî fûr de “realtât burocratiche” e cjalâ la realtât sociâl:

• al covente formâ e cjapâ a vore un grant numar di insegnants pardabon competents;
• al covente un sisteme scolastic cun obietîfs definîts e une verifiche cualitative e cuantitative dai risultâts;
• al covente che la Regjon e vedi competence primarie su la istruzion e che e dopri la sô autonomie cun responsabilitât.

Fin che no saran chestis robis, a saran sì dome bêçs butâts vie par creâ une realtât burocratiche che e zove dome a gjavâ argoments ai furlaniscj (“La Regjon e fâs pûr tant…”) e a dâ une justificazion bausarie al podê e ai stipendis di cualchi politic e funzionari che, invezit di promovi la lenghe furlane, le puarte a murî in cidin.

(*tal numar 16, https://ilpassogiusto.eu/certificazion-des-competencis-in-lenghe-furlane-dula-sestu/ )