Certificazion des competencis in lenghe furlane, dulà sêstu?

La Leç Regjonâl 29 dal 2007 e previodeve che, dentri di 6 mês de sô jentrade in vore, la Zonte Regjonâl e fasès bon un Regolament e che in altris 6 mês al fos istituît un sisteme di certificazion uficiâl des competencis linguistichis te lenghe furlane, come che a ‘nd è par dutis lis lenghis normâls dal mont.
La certificazion des competencis linguistichis e je un imprest fondamentâl par ricognossi la utilitât di une lenghe, soredut a nivel professionâl: tal insegnament, tai uficis publics, tai lavôrs a contat cul public.

Chest articul al vûl presentâ cuale che e je vuê la situazion e cemût che si è disglagnade la dinamiche che le à produsude. Tant che autôr di chest scrit o visi che o ai vût part, par vie de mê profession, in plui di cualchi fase di chest percors e che o scrif convinçût che lis ideis e cjaminin a pâr cun lis azions des personis.

I prins pas

A pene fate buine la LR 29/2007 la ARLeF, cun president Lorenzo Fabbro e diretôr Massimo Duca, si jere mote ben e svelte: sigure di jessi poiade de zonte di Riccardo Illy, cun assessôr ae culture Roberto Antonaz, e veve metût i fiers in aghe par rivâ in curt a fâ i regolaments (chel pes certificazions e ancje chei altris) che a coventavin par meti in vore la leç. In pôc timp il test di someti ae zonte al è stât prontât (cun consulence di cui che al scrif), ma intant al è sucedût un savoltament politic: tal principi dal 2008 il president Illy al à fat la sielte di anticipâ lis elezions, sigûr di vincilis, e invezit lis à pierdudis a favôr di Renzo Tondo, che al à simpri declarât di jessi cuintri di cualsisei azion politiche a pro de lenghe furlane.

Une lungje storie di omissions, ineficience e “prudence”

Cussì dilunc de legjislature Tondo, in pratiche dut ce che al tocjave la lenghe furlane al è restât fer: i assessôrs competents (prime Roberto Molinaro, po dopo Elio De Anna) a son stâts tignûts intune posizion di debilece, la ARLeF, passade sot dal president Lorenzo Zanon e dopo un pôc direte no plui di Massimo Duca ma di William Cisilino, e je jentrade intune fase involutive: il risultât principâl de gnove gjestion al è stât chel di riordenâ i ecuilibris di podê dentri de Agjenzie, neutralizant di fat il Comitât Tecnic Sientific e incressint il podê dal diretôr.

La zonte Tondo e la ARLeF, par cinc agns a son stadis responsabilis di omission, a àn blocât a plen l’iter dal regolament pes certificazions.
Si à di notâ une robe: gjavant cualchi coment individuâl (ancje gno) une vore critic, no je stade une vere proteste par cheste omission, di bande dal mont furlanist. Parcè? O pensi che si vedi calcolât (cun dutis lis resons) che, viodude la contrarietât e/o lis capacitâts di chei che a vevin il podê in chel moment, se a vessin metude man sul sisteme di certificazion a varessin fat dome piês. In ogni câs la responsabilitât e reste di cui che al à il dovê legâl di fâ un procediment, e no de opinion publiche, che par altri su chescj argoments e je scoltade propit pôc.

Tal 2013 e je finide la aministrazion Tondo e la zonte Serracchiani e à tornât a meti president de ARLeF Lorenzo Fabbro, che al veve lavorât une vore ben tal so prin mandât. Magari cussì no, cheste volte lis cundizions a son stadis piês: l’assessôr Gianni Torrenti, dut al contrari di ce che al veve fat Roberto Antonaz, al à mostrât une contrarietât restive aes iniziativis pe lenghe furlane e al à metût in vore un ostruzionisim avonde fuart. Cun dut achel, Fabbro al è rivât a otignî che la zonte Serracchiani e fasès bon il regolament pes certificazions, tal mês di Mai dal 2014 (a jerin za passâts 6 agns dal tiermin legâl…) cuntun test che al jere scuasi dal dut compagn di chel za prontât sul principi dal 2008, dome cun piçui mudaments (un sbassament cualitatîf pal nivel intermedi di cognossince e plui enfasi ae autoritât de ARLeF).

Te seconde metât dal 2014 la ARLeF e cjapave contat cun professioniscj che a varessin podût fâ il lavôr concret (la cooperative Serling) e e destinave une sume (fin a 40.000 euros): il diretôr William Cisilino, dut câs, al à sielzût viis burocratichis di afidament dal lavôr che no podevin jessi metudis in vore, di mût che dute la operazion e je lade in nuie e la sume stanziade e je finide in economie. Cheste incapacitât o impussibilitât di spese de ARLeF e à puartât a vê un altri pâr di agns di ritart.

Tai fats si à tacât a lavorâ sul materiâl che al coventave pes certificazions tal Avrîl dal 2017, cuant che la Universitât di Udin, dopo di vê vût une incarghe uficiâl par chest fin, e à impleât il personâl che al coventave (ancje cui che al scrif). Il lavôr tecnic, coordenât de prof.sse Fabiana Fusco, nol à vût intops inte elaborazion, ma dut l’iter al è stât cjapât de ARLeF intune maniere une vore “prudente”: al risultave che, soredut tal ambient de scuele, e faseve un grum di pôre la istituzion di un sisteme di certificazion, par vie che al sarès vignût fûr che la plui part di docents che vuê a insegnin furlan di fat no àn la preparazion che e covente.

Tal 2018 al è stât un cambi politic, cu la vitorie di Massimiliano Fedriga, dopleade tal 2023: se la presidente Serracchiani e veve cualchi disponibilitât, avonde clipe, pe lenghe furlane, ma e lassave che dispès Torrenti al fasès cuintri, lis dôs zontis Fedriga no àn mostrât ni une vere contrarietât, ni un vêr interès. Par decision de zonte Fedriga, la presidence de ARLeF, ae fin dal 2018, e je passade a Eros Cisilino.

Une storie cence fin, ancjemò in spiete di rivâ a une soluzion

La “prudence”, che e jere za prime, e je lade indenant e e à puartât a doprâ il materiâl plui tart che si podeve, a movi obiezions tecnichis che no vevin fonde, ma che a àn fat pierdi energjiis e timp, a rivâ a formâ i certificadôrs dome tal 2022. Ancje chi al è stât cualchi episodi esemplâr di ritart e ineficience: par dî une, ancje se la formazion dai certificadôrs e je stade dade in man ae Universitât di Udin, cuntun cors di fâ jenfri la fin di Jugn e Otubar dal 2022, la ARLeF e à pretindût di fâ jê la selezion des personis ametudis al cors. Il risultât al è stât dome di pierdi timp viodût che lis domandis a son stadis fermis setemanis a dilunc, fasint ritardâ di passe doi mês l’inizi dal cors: dome une gote tal mâr di ritarts e di ineficiencis che e dure di plui di 15 agns… ma in ogni câs une gote in plui.

L’interès dai cultôrs de lenghe furlane, par altri, al è stât cussì alt che invezit di formâ un minim di 10 personis, a son stadis formadis passe 40, dividudis in doi cors: un di Setembar a Dicembar 2022, chel altri di Dicembar 2022 a Fevrâr 2023 (in chest câs e je di rimarcâ la reazion avonde positive di ARLeF e Universitât, che a àn vût di frontâ un impegn dopli di chel previodût). Tal Març dal 2023 la formazion e jere rivade insom e si varès podût tacâ a fâ funzionâ, cun “dome” 15 agns di ritart, il sisteme di certificazion, cuntun prin grup di cualchi desene di esaminadôrs.
Invezit par un altri an no si è mot nuie: al somee che i sorestants de ARLeF a vedin impleât un pôc di timp a valutâ cemût cjapâ e mantignî lôr il podê sul sisteme di certificazions, ancje a cost di lâ cuintri dai contignûts dal Regolament istituît dal Decret dal President de Regjon dal 2/5/2014.

L’ultin episodi cognossût di cheste storie burocratiche cence fin al è dai prins mês di chest an: la ARLeF e à produsut ai 24/1/2024 un bant dulà che e visave che chei che a vevin frecuentât i cors dal 2022-23 a podevin fâ domande di jentrâ te prime liste uficiâl dai comissaris di esam pes certificazions. Al bastave fâ domande e mandâ il curriculum (che la ARLeF e veve za, stant che i corsiscj ju veve selezionâts propit jê, dome su la fonde dal curriculum mandât te Vierte dal 2022). Passât un mês a spietâ che i interessâts a mandassin i documents, e cjapât un altri mês par valutâ la regolaritât di chei documents, tal Març dal 2024 i aspirants comissaris a àn vût comunicazion che a son stâts acetâts. Al jere passât juste un an di cuant che a vevin finît la lôr formazion.

O sin tal Istât dal 2024 e vuê, in struc, il sisteme di certificazion ancjemò nol è in vore.