Skip to main content
Duilio Corgnali

In memorie di pre Duilio Corgnali. Lis sôs ideis a varan di continuâ a jessi di ispirazion par ducj i furlans


«Il Friûl lu àn tornât a fâ sù, ma i furlans a son ancjemò disfats»: lu diseve simpri pre Duilio Corgnali, mancjât masse adore al principi di chest an bisest. I vignive dûl a viodi il Friûl che al finìs su lis primis pagjinis dai gjornâi talians dome par disgraciis o barzaletis, e che nol à cussience dal valôr de sô storie e de sô lenghe. I vignive dûl a viodi un popul che si è masse passût di un benstâ che di chestis bandis no si jere mai viodût e che no si sa trop che al podarà durâ. I vignive dûl a viodi tantis glesiis simpri plui vueidis e tantis animis che no cjatin plui une strade, intun Friûl che al veve simpri vût la fede come un rimpin sigûr dulà tacâsi.

Cumò, o sin nô che o vin dûl par vê pierdude une personalitât inteletuâl di prin plan. Un om di valôr che si jere fat i vues e al veve uçadis lis ongulis tai agns dal taramot, un periodi che al tornave dispès tes sôs riflessions. Alì, di zovin plevan, al veve sperimentade za in tendopoli cuale che e podeve jessi la fuarce des comunitâts che a vuelin ricognossisi intune identitât ugnule, e frontâ lis dificoltâts insiemi e no ognidun par so cont. Un spirt antîc, che al ven de storie des viciniis e di une autonomie di fat che la int di chenti e à simpri esercitât ancje cuant che e viveve in miserie.

L’insegnament che al vignive de esperience dal 1976 al è simpri stât un riferiment par pre Duilio, parcè che la disgregazion des comunitâts, dai valôrs, des fameis e de identitât le veve sot dai voi ogni dì. Par chest al à lavorât une vore par tignî dongje lis comunitâts dai cristians e dai furlans, deventant une vuide di impuartance fondamentâl soredut pe sô grande abilitât inte comunicazion sociâl. Metint in pîts imprescj come Radio Spazio e La Vita Cattolica al è stât un mestri par tancj gjornaliscj che di lui e cun lui a àn imparât il mistîr di fevelâ cun clarece e scletece.

La sô passion pe lenghe furlane e à dât cûr a tancj par batisi fûr e dentri de glesie. Nol è un câs se in pôcs agns in Regjon si sedi aprovade la leç 15/96, in Parlament la leç 482/99 e a Rome la Cei e vedi licenziade la Bibie: tancj si son cjapâts i merits, ma lis pocadis plui fuartis lis deve lui.

In sumis, pre Duilio al jere un grant inovadôr. Tes sinis de tradizion, religjose e culturâl, clâr, ma un inovadôr. La che no si rivave cui imprescj che a jerin, al cjatave o al fondave altris. Al è stât cussì cul Centri diocesan pes comunicazions sociâls, ma si pues dî che la sô opare no à mai lassât lis robis compagnis a cemût che lis à cjatadis. Soredut se a vevin a ce fâ cu la culture, che e jere par lui la arme plui fuarte par fâ cressi la cussience.

Al à simpri pensât e afermât, difat, che un popul al vedi di scombati a colps di ideis e peraulis di veretât par fâ viodi di esisti, e di jessi un toc fondamentâl ta chel grant mosaic che e je la creazion di Diu.

Il mosaic: une metafore che al doprave une vore par descrivi la nature policentriche e plurilengâl dal Friûl, di simpri peade ae nature inclusive de Glesie di Aquilee. Une diocesi cussì “speciâl” che si jere struturade su ducj i teritoris in maniere capilâr e “democratiche”, deventant l’unic pont di riferiment vêr pal popul cuant che l’Imperi al jere sbrissât fûr de storie.

Al è par pontâ fûr cheste evidence che pre Duilio al à metût une vore di energjie in dute la sô opare di predi e di inteletuâl, che al à simpri caraterizât cuntun sproc furlanist che lu à fat jessi un pont di riferiment par tancj, ma i à ancje sieradis tantis puartis de jerarchie gleseastiche. O sin pardabon in tancj chei che a pensin che bonsignôr Corgnali al sarès stât un vescul pardabon in sintonie cul cûr profont di cheste tiere, in sintonie cu la sô storie e cu la sô identitât. Nol è stât cussì, e al è stât un pecjât. Il vêr pecjât cumò al sarès dismenteâ la sô lezion, e menâ il cjan pal agâr invezit di lâ daûr di chel agâr che ogni setemane al sgjavave cu la sô pene su La Vita Cattolica.

Cungjò pre Duilio, polse in pâs. E che i furlans ti scoltin …

Walter Tomada

Insegnant, scritôr, diretôr da “La Patrie dal Friûl”.

Iscriviti alla newsletter de Il Passo Giusto per ricevere gli aggiornamenti