Ancjemò sul Plan Gjenerâl di Politiche Linguistiche pal Furlan. Lis critichis intal merit.

O sin za intervignûts (https://ilpassogiusto.eu/al-friulano-non-far-sapere/) sul iter di aprovazion dal Plan Gjenerâl di Politiche Linguistiche pal Furlan 2026 -2030. Chi o lin a tocjâ almancul cualchidune des cuistions presentant i ponts critics segnalâts de conseire regjonâl dal Pat pe Autonomie Giulia Massolino dilunc de sentade dai 3 di Març inte Comission competente dal Consei regjonâl, che par leç e veve di dâ un parê sul Plan.

L’intervent si è sierât cuntun vôt di astension.

Un pocjis di osservazions gjenerâls

• No son informazions su cui che al à dât dongje i contignûts dal PGJPL. La paternitât si pues assegnâle ae ARLeF, ma nol è clâr cui che in concret al vedi butât jù il document: il C.d.A., il Comitât Tecnic Sientific, il diretôr, cualchi dipendent, cualchi colaboradôr esterni, il Sportel linguistic regjonâl pe lenghe furlane? No je une cuistion secondarie stant che savê cui che lu à butât jù al permet di capî se a jerin lis competencis che a coventavin par fâlu.
• Il Plan al è stât prontât cence partecipazion e cence condivision. Al contrari di ce che al sucêt inte plui part des comunitâts li che si fevele une lenghe minoritarie, te fase di preparazion nol è stât cjapât dentri nissun dai operadôrs dal setôr. Dome cuant che il test al jere za pront, e dopo un prin vie libare de Zonte regjonâl, al è stât presentât par un parê ae Comission regjonâl consultive pe minorance linguistiche furlane.
• Il PGJPL al è componût di 12 pagjinis di introduzion, 28 pagjinis relativis ae inchieste sociolinguistiche dal 2023, 11 pagjinis cun riferiments normatîfs, 56 pagjinis dedicadis a curtis descrizions (par altri parziâls e cualchi volte, a nestri judizi, imprecisis) dai sogjets finanziâts intai agns passâts e aes tabelis cu lis cifris di chescj contribûts, intant che il Plan efetîf al ven disvilupât in dome 30 pagjinis. Par jessi un document di progjetazion des ativitâts di fâ tai cinc agns che a vegnin, al è un test tant sbelançât.
• I dâts de inchieste sociolinguistiche dal 2023 a son parziâi e no permetin une analisi puntuâl. Plui voltis e je stade prometude la publicazion, ma i dâts complets ancjemò no son stâts metûts a disposizion di ducj. Il PGJPL stes ju ripuarte dome cun elements parziâi (impedint une valutazion complete e lassant vueits informatîfs impuartants) e dispès cun deduzions che, in mancjance dal cuadri complet, a risultin dificilis di verificâ e, in cualchi câs, no batin cu la realtât dai fats.
• Al mancje cualsisei dât riferît ai indicadôrs di prodot, presentâts come un pilastri dal Plan di prime e che ducj i sogjets riclamâts intal PGJPL a jerin clamâts a scrivi intes anualitâts passadis. Il fat che a mancjin di plate fûr chescj dâts (ancje se a jerin indreçâts ae racuelte di dâts cuantitatîfs plui che cualitatîfs) al fâs che al sedi impussibil capî ce che al à funzionât e ce che nol à funzionât intal Plan di prime e di consecuence, dulà che al covente cambiâ vele.
• Intal PGJPL si rimande cuasi dut a Plans di atuazion setoriâi che a son ancjemò di fâ, che i diviers sogjets publics (a son escludûts i sogjets dai articui 23 e 24 de LR 29/2007, ven a stâi lis realtâts associativis e lis emitentis radiofonichis ricognossudis pe lôr impuartance primarie pe lenghe furlane) a son clamâts a prontâ cu la consulence de ARLeF. In chescj Plans a scugnaressin cjatâ definizion i obietîfs, lis misuris di meti in vore, il personâl e lis fonts di doprâ. Alore al è pardabon dificil dâ cualsisei valutazion (e – fevelant di Direzions regjonâls, Ents locâi, ACLiF, ARLeF, e v.i. – si fevele des areis plui impuartantis de planificazion linguistiche).
• Al mancje cualsisei riferiment ai invistiments che si pense di fâ e no dome pai sogjets clamâts a prontâ Plans di atuazion, ma ancje pes realtâts ricognossudis di primarie impuartance dai articui 23 e 24 de LR 29/2007. Se un PGJPL al è cence nissun riferiment aes risorsis disponibilis al devente impussibil valutâ la fatibilitât di ce che si declare di volê fâ. In chest sens al è ben visâsi che, par diviers ents ricognossûts, i contribûts a son restâts simpri chei par agns, intant che lis spesis a son cressudis une vore. Intal Plan no si dîs nancje une peraule su cheste problematiche e su cemût che si vûl frontâle.

Cualchi valutazion intal merit

Cundut che il PGJPL inte sô jentrade al feveli di model partecipatîf, policentric e flessibil («…si passe di un model centralizât, là che la Regjon e fissave intal detai dutis lis azions di fâ, a un model policentric e partecipatîf, là che i diviers sogjets clamâts a meti in vore il Plan a deventin protagoniscj atîfs.») intai fats chest al vâl in buine sostance pes struturis publichis (ven a stâi chês li che la Regjon e à plui titui par intervignî e chês che dispès, in chescj agns, si son mostradis “distratis” par ce che al tocje il rispiet des leçs di tutele), ma no pai ents che di agns a lavorin in prime linie pe lenghe furlane e che a son ricognossûts cui articui 23 e 24 de LR 29/2007: par lôr invezit si fâs une politiche ancjemò di plui incentradore e restritive. Al baste pensâ che intai cjapitui 8 (pagj. 128) e 9 (pagj. 132) dal PGJPL che a rivuardin chescj sogjets si specifiche che «i progjets finanziâts, in dut o in part, cun fonts regjonâi o di ents publics che a àn fonts de Regjon Autonome Friûl Vignesie Julie [par altri, cun cheste formulazion, si va a vincolâ cualsisei sogjet che al vedi ancje un contribût public minim ancje no colegât in maniere direte al furlan] a son tignûts a ubidî aes liniis vuide prontadis de ARLeF» e che «la adesion a chestis indicazions e costituìs une cundizion necessarie pal acès ai finanziaments.»

Chestis liniis vuide ancjemò no son stadis butadis jù (duncje no si sa se a contegnin elements di nature dome “tecniche” o a van a tocjâ, o a ferî, temis sensibii che a rivuardin la linie diretive, l’orientament e, plui in gjenerâl, la libertât dai singui sogjets) ma, in ogni câs, a assegnin ai orghins diretîfs de ARLeF un podê cuasi “di vite o di muart” sui ents in cuistion, calcolât che il tai dai contribûts al pues decretâ – soredut pai sogjets mancul struturâts – che si sierin lis ativitâts. Intal câs dai mieçs di comunicazion, ancje se interpretade dome in clâf “tecniche”, cheste disposizion e va a pericul di jessi lesive dal dirit di espression e di libare informazion. Cheste indicazion dal PGJPL e somee alore plui une operazion di polizie che no di politiche linguistiche.

Il PGJPL, plui in gjenerâl, al evidenzie un incentrament des competencis gjestionâls e decisionâls su la ARLeF (e il so compit al varès di jessi in realtât chel di dâ indreçaments e segnâ prioritâts di azion) ancje in temis – par esempli chei leâts al corpus e ae linguistiche – li che nol risulte che la ARLeF e vedi lis competencis che a coventin par decidi. Che si pensi, par esempli, al riferiment ae definizion di une pronunzie standard pal furlan: ametût che e sedi pardabon une robe buine, cui varessial di decidile viodût che tra direzion, personâl, C.d.A. e C.T.S. de Agjenzie, nol è nissun profîl professionâl cu lis competencis sientifichis par cjapâ decisions di cheste sorte? Cemût fasaraie, cun di plui, il ARLeF a fâ ducj i compits metûts in liste tal Plan se za cumò no rive a gjestî in maniere eficiente chei compits che i son stâts dâts. Che si pensi, par esempli, ai luncs mês che i coventin par esaminâ lis domandis e i rindiconts presentâts dai ents ricognossûts che a oblein i ents stes a spietâ une vore di timp prime di vê pardabon i contribûts che a àn za vûts destinâts; la ARLeF e à fintremai scugnût zovâsi dal lavôr di une societât esterne.

Un altri dubi al tocje il coinvolziment continui dal Sportel linguistic regjonâl tant che riferiment tecnic e specialistic pes diviersis azions di meti in vore. E je irealistiche la idee di rimeti compits di control, disvilup e regolamentazion de planificazion linguistiche a un sogjet za cjamât di lavôr e che il so personâl si cjate a lavorâ in cundizions di subapalt. Il Sportel, al contrari di ce che il so non al fasarès pensâ, nol è un ufici public, ma al è gjestît cumò di une imprese privade cun altri fin sociâl. I siei dipendents, par tant che a puedin jessi formâts sul plan linguistic, in gjenar nol somee che a vedin ancje chês competencis sientifichis, didatichis, formativis e gjornalistichis che a coventin par frontâ i compits che ur da il PGJPL. Alore al è legjitim domandâ se lis ativitâts imponudis ai operadôrs dal Sportel no a sedin soredimensionadis a pet des sôs pussibilitâts operativis reâls.