Chest lûc. Parcè e par ce robe
Somari dai contignûts
- Formazion, organizazion, politiche
- Achì e cumò
Il prin numar di une iniziative editoriâl, piçule o grande che e sedi, cun cualsisei media, al à di dâ acet cence fal ae ilustrazion dai motîfs e dai obietîfs de imprese. No volìn gjavâsi di chest dovê.
Propit in chestis setemanis al è stât fat il passaç di proprietât di doi cuotidians regjonâi des mans di une societât che e je part di grups finanziaris e industriâi globâi, a proprietâts detignudis di cualchi imprenditôr cun diviersis ativitâts inlidrisadis tal tiessût socioeconomic locâl.
Ancje se la vendite dai cuotidians e cale in maniere costante, tant che a metin in evidence dutis lis ricercjis di marcjât, lant a incidi ancje su la reditivitât dal invistiment, al è clâr a ducj che la informazion no je une cualsisei marcjanzie.
Massim in periodis come chest, là che a esistin simpri mancul cuarps intermedis atîfs, partîts, sindicâts o associazions economichis di cualsisei gjenar, in stât di rapresentâ in mût pardabon partecipât e condividût il cuarp di iscrits o associâts, consultâts in mût regolâr tai lûcs deputâts.
Simpri plui dispès lis cjariis publichis, tes istituzions ma no dome, a son une cariere e no un servizi, un podê di conservâ. Duncje cui che al cree consens al è simpri plui impuartant, man a man che e cale il numar dai partecipants ae vite sociâl e politiche e che il consens al à une dimension personâl e nol è determinât de adesion convinte a progjets condividûts se no, fintremai, costruîts insiemi.
No par nuie o sin ae ipotesi di elezion direte dal president dal consei, e aes domandis di slungjâ lis pussibilitâts di mandâts eletîfs, e al cumul di cjariis in ents de cjamare, culturâi o economics che a sedin.
Formazion, organizazion, politiche
Al Pat pe Autonomie tai mês passâts al è capitât alc di diferent. Almancul in part, e o volìn cjapâlu tant che un segnâl positîf, une oportunitât di coltivâ.
Al è capitât che prime e dilunc de tornade eletorâl regjonâl e aministrative di chest an, il lavôr fat te legjislature regjonâl che si è concludude, al è stât preseât in mût inspietât e slargjât. Chest al à permetût la presentazion di listis viertis a altris sogjets politics civics, regjonâi e locâi, a personis cun competencis, esperiencis e passions civîls. Il risultât al è stât plui che positîf. E je cumò une rêt di rapuarts che e pues dâsi lûcs di dialic e di azion, di costruzion di pinsîrs ideâi e politics, di formazion di gnovis identitâts, di definizion di obietîfs di resistence e di inovazion dentri la nestre dimension regjonâl e insiemi ultraregjonâl.
Chest tentatîf di setemanâl in linie al è, al sarà, alore une prove par costruî un perimetri, larc, permeabil, di tornâ a verificâ, di cognossincis, opinions, condivisions di cheste rêt, par slargjâle ancjemò.
No (dome) informazion, no (dome) aprofondiment, ma ricercje di contribûts e ponts di viste, organizazion dal dialic, costruzion di lûcs di decision e di iniziative economiche, sociâl, culturâl, politiche. E recupar di passion, partecipazion, sperance. E, infin, costruzion di consens gjestît e rapresentât di politics libars e autonoms dal mont des disinformazions e des informazions interessadis.
“Ducj i citadins a àn dirit di associâsi in libertât in partîts par concori cun metodi democratic a determinâ la politiche nazionâl”: o sin convints che dome sogjets cussì concepîts a podaran rindi efetive la democrazie republicane previodude de Costituzion. A chest o volaressin contribuî.
Achì e cumò
Po al è il teme dai perimetris e des gjeometriis variabilis.
Si trate di sielzi i argoments di lâ daûr, chei di lassâ di bande e chei di rimandâ.
E ancjemò di cirî, cjatâ, (ri)ativâ, personis, savês, convincint che e vâl la pene insiorâ insiemi un strument che al à tantis pussibilitâts, versatil ancje tai struments che al pues doprâ.
E po savê tratâ lis prioritâts; e po, chest al sarès il massim, rivâ a trasformâ resonaments, intuizions, propuestis, in azion e iniziative sedi istituzionâl, sedi teritoriâl, sociâl, culturâl.
Visantsi di jessi artesans modescj…
In cheste imprese e pues judâ la nature di cheste nestre regjon.
Une regjon complesse, adriatiche, di mont e di planure. Policentriche ma che i mancje un guvier teritoriâl clâr. Economiis agriculis e industriâls, comerciâls e turistichis. Lûc de economie globâl tant che di economiis autocentradis. Traviersade di logjistichis energjetichis e comerciâls. Aree di confin ma transnazionâl. Di gnûf impuartante plateforme militâr. In transizion demografiche dificile pes gjenerazions e pes comunitâts origjinariis e chês in formazion. Une regjon europeane e taliane tes crisis di identitât di ducj i doi i pôi istituzionâi. Tal biel mieç dal riscjaldament globâl…
Une regjon speciâl e tant di fâ par capî cemût fâ politiche, ben, al miôr. Fasìnsi i auguris!
Elia Mioni, diretôr editoriâl di “Il Passo Giusto”
Massimo Moretuzzo, segretari dal Pat pe Autonomie